Aşgabatda «RŽD Logistika» paýdarlar jemgyýeti, «RŽD» açyk paýdarlar jemgyýeti we Türkmen demir ýollarynyň wekilleriniň arasynda duşuşyk geçirildi. Duşuşygyň dowamynda «Demirgazyk-Günorta» halkara ulag geçelgesiniň gündogar şahasy boýunça haryt daşamagyň şertlerini gowulandyrmak üçin ikitaraplaýyn hyzmatdaşlygyň mehanizmleri göz öňünde tutuldy diýip, «RŽD Logistika» habar berýär.
Taraplar bäsdeşlik nyrhnama şertlerini saklamagyň mümkinçiligini ara alyp maslahatlaşdylar, ýüztutmalary gyssagly tassyklamagyň we ulag geçelgesiniň gündogar şahasy boýunça haryt daşamak üçin nyrhlaryň alynmagynyň tertibini hem-de şertlerini kesgitlediler, şeýle hem Türkmenistanyň gümrük edaralary bilen özara gatnaşyk meselelerine garadylar.
Bu meseleleriň çözülmegi ulag geçelgesiniň geçirijiligini ýokarlandyrmaga we «Demirgazyk-Günorta» ulag geçelgesiniň gündogar şahasynda yzygiderli gatnawlaryň bolmagyny üpjün edýän ýük bazasyny ýokarlandyrmaga kömek eder diýlip, habarda aýdylýar.
Ýeri gelende ýatlap geçsek, ýaňy-ýakynda «RŽD Logistika» (RF), KTZ Express (Gazagystan) we «Türkmenistanyň ulag-logistika merkezi» halkara we üstaşyr ýük gatnawy boýunça hyzmatdaşlyk Ähtnamasyna gol çekdiler.
