Biraz ozal Angliýanyň premýer-ligasynyň 15-nji tapgyryndan orun alan dört duşuşyk tamamlandy. Günüň iň üns çekiji gapma-garşylygynda «Mançester Siti» «Fulhemi» kabul edip, kynçylyk bilen 2:1 hasabynda ýeňiş gazandy. Oýnuň 17-nji minutynda Hulian Alwarez ýer eýelerini hasapda öňe çykardy. Emma 26-njy minutda «Sitiniň» goragçysy Žoau Kanselunyň öz jerime meýdançasynda gödek oýnamagy onuň emin tarapyndan gyzyl kart bilen jezalandyrylmagyna hem-de Andreas Pereýranyň penaltiden hasaby deňlemegine sebäp boldy. Şeýle-de bolsa Gwardioladan tälim alýan topar ýeňşi öz tarapyna agdyrmagy başardy. Ikinji ýarymda ätiýaçdan oýna giren Erling Holand emin tarapyndan goşup berlen minutlarda penaltiden gol urup, ýer eýelerine ýeňiş getirdi. Netijede «Mançester Siti» utuklarynyň sanyny 32-ä ýetirip, turnir tablisasynda birinji orna göterildi. Häzirlikçe 31 utugy bilen ikinji ýere düşmeli bolan «Arsenal» ertir «Çelsiniň» meýdanyndan ýeňişli dolanyp bilse, ýaryş jedweliniň birinji ornuna göterilip biler.
Günüň beýleki oýunlarynda bolsa «Braýton» myhmançylykda «Wulwerhemptony» 3:2, «Lids» öz öýünde «Bornmuty» 4:3 hasabynda ýeňlişe sezewar etdi. «Nottingem Forest» bilen «Brentfordyň» arasyndaky oýun bolsa 2:2 hasabyndaky deňlikde tamamlandy.
