Angliýanyň premýer-ligasynyň 9-njy tapgyry dartgynly duşuşyklara baý geçdi. Şenbe güni geçirilen oýunlarda «Mançester Siti» «Sauntgemptony» Kanselunyň (20), Fodeniň (32), Mahreziň (49) we Holandyň (65) gollary bilen 4:0 hasabynda ýeňlişe sezewar etdi.
Şol oýun arkaly Erling Holand täze toparyndaky gollarynyň sanyny 20-ä ýetiren bolsa, «Sitiniň» özi APL-daky bassyr dört oýunda 4+ gol geçiren ilkinji topar boldy.
Şeýle-de «Siti» bu ýeňiş arkaly bir günlük bolsa-da turnir tablisasynda lidere öwrüldi. Mundan başga-da şenbe agşamynda öz öýünde oýnan toparlardan «Çelsi» «Wulwerhemptony» 3:0, «Nýukasl» «Brentfordy» 5:1, «Bornmut» «Lesteri» 2:1 hasabynda ýeňmegi başardylar. Şenbe myhmançylygyndan diňe «Braýtony» Keýniň 22-nji minutdaky goly bilen minimal hasapda ýeňen «Tottenhem» 3 utukly dolandy. Tapgyryň merkezi oýny ýekşenbe agşamynda «Arsenal» bilen «Liwerpulyň» arasynda geçdi. Gollara we dramatiki pursatlara baý bolan oýunda turnir tablisasynyň lideri «Arsenal» 3:2 hasabynda (Gollar: Martinelli 1, Saka 45+5, 76.p — Nunýes 34, Firmino 53) ýeňiş gazanyp, birinjiligi özünde saklap galdy. «Liwerpul» bolsa bu ýeňlişden soňra 10 utuk bilen 10-njy ýere ornaşdy.
Şeýle-de düýn «Ewertonyň» myhmany bolan «Mançester Ýunaýted» ilkibada Iwobiniň (5) dürs urgusy zerarly hasapda yzda galan hem bolsa, soň özüni dürsäp, Antoniniň (15) we Ronaldunyň (44) gollary bilen ýeňiş gazandy. Şeýle-de düýnki oýunlaryň çäginde «Krystal Pelas» öz öýünde «Lidsi» 2:1, «Fulhemi» myhman alan «West Hem» bolsa 3:1 hasabynda ýeňiş gazandy. Tapgyryň soňky oýny şu gün 23:59-da «Nottingem Forest» bilen «Aston Willanyň» arasynda bolup geçer. 9 tapgyrdan soňra turnir tablisasynyň ilkinji bäşligi aşakdaky görnüşe eýe:
- «Arsenal» 24 utuk (9 oýun);
- «Mançester Siti» 23 utuk (9 oýun);
- «Tottenhem 20 utuk (9 oýun);
- «Çelsi» 16 utuk (8 oýun);
- «Mançester Ýunaýted» 15 utuk (8 oýun).
Çempionşibe düşürýän howply zonada bolsa, «Wulwerhempton» (9 oýun, 6 utuk), «Lester» (9 oýun, 4 utuk) we «Nottingem Forest» (8 oýun, 4 utuk) toparlaryny görmek bolýar.
