UEFA Milletler ligasynyň toparçalardaky birinji tapgyrynyň çäklerinde Italiýa bilen Germaniýanyň milli ýygyndylarynyň arasynda geçen duşuşyk deňme-deň tamamlandy. A liganyň 3-nji toparçasynda çykyş edýän milli ýygyndylar oýny 1:1 hasabynda tamamladylar.

Italiýanyň Bolonýa şäherindäki “Renato Dall’Ara” stadionynda geçirilen furbol duşuşygynyň 70-nji minutynda Wilfred Nýontonyň ýardam pasyndan soň Italiýanyň ýarymgoragçysy Lorenzo Pellegrini tapawutlanan bolsa, şondan 3 minut geçip-geçmänkä hem Ýozua Kimmih hasaby deňledi. Netijede toparlar utuklary özara paýlaşdylar.

Geçirilen bir oýnuň netijesinde bu toparçada 3 utuk bilen Angliýadan üstün çykan Wengriýanyň ýygyndysy 1-nji orunda, özara deňme-deň oýnan Italiýa we Germaniýa 1 utuk bilen 2-3nji orunlarda we utuk gazanyp bilmedik iňlisleriň ýygyndysy 4-nji orunda ýaryşy dowam edýär.

Belläp geçsek, Milletler ligasyna häzirki wagtda Ýewropa ýaryşlaryna mümkinçiligi bolan 55 milli ýygyndy topar gatnaşýar. Ýaryş jemi 14 toparça boýunça A, B, C ligalaryň hersinde 4 toparça boýunça bölünip, D ligada 2 toparça bardyr. Ligalardaky duşuşyklar hem häzir parallel dowam edýärler.

Milletler ligasy UEFA-nyň guramagynda her 2 ýyldan geçirilip, milli ýygyndylaryň reýtingdäki netijeleriniň we orunlarynyň ýokarlanmagyna ýa-da pese düşmegine täsir edýär. Ol UEFA-nyň ýörelgesine laýyklykda, her ýylda geçirilýän dostluk duşuşyklarynyň ornuny tutmak bilen, milli ýygyndylaryň dünýä hem-de Ýewropa çempionatlaryna çykmagyna hem ýardamy bardyr.