Özbegistanyň Prezidenti Şawkat Mirziýoýewiň çakylygy boýunça 2021-nji ýylyň 11—12-nji martynda Gyrgyzystanyň Prezidenti Sadyr Japarowyň Özbegistan döwletine resmi iş sapary boldy
Gyrgyz Lideri 11-nji martda Özbegistana döwlet saparynyň çäginde Daşkendäki «Mustakillik» meýdançasyndaky «Garaşsyzlyk we ynsanperwerlik» ýadygärligine gül goýdy.
Gyrgyzystanyň Prezidenti Sadyr Japarow bilen Özbegistanyň Prezidenti Şawkat Mirziýoýewiň resmi ýygnak dabarasy Daşkendäki Kuksaroý köşgünde geçirildi. Döwlet Baştutanlarynyň resmi ýygnagynda dostluk, hoşniýetli goňşuçylyk, ynam we strategik hyzmatdaşlyga esaslanýan iki ýurduň arasyndaky gatnaşyklary has-da pugtalandyrmak we ösdürmek meseleleri ara alnyp maslahatlaşyldy.
Gepleşiklerden soň, köptaraplaýyn özbek-gyrgyz hyzmatdaşlygynyň ähli ugurlaryny öz içine alýan 22 resminama gol çekildi. Gol çekilen bu resminamalaryň arasynda 50 töweregi bilelikdäki taslamanyň durmuşa geçirilmegini üpjün edýän, Senagat hyzmatdaşlygyny giňeltmek we çuňlaşdyrmak üçin amaly hereket meýilnamasy, Özbek-Gyrgyz maýa goýum gaznasyny döretmek baradaky şertnama, Özara elektrik üpjünçiligi we Gyrgyzystanda gidroelektrik desgalarynyň gurluşygy boýunça hyzmatdaşlyk etmek baradaky resminama bar. Şeýle hem, iki ýurduň Daşary işler ministrlikleriniň arasynda gümrük, harby we harby-tehniki hyzmatdaşlyk, saglyk, azyk howpsuzlygy, ösümlik karantini, bilim, ylym we medeniýet ýaly birnäçe möhüm resminama gol çekildi.
Gol çekiş dabarasy tamamlananyndan soň, Özbegistanyň we Gyrgyzystanyň Prezidentleri bilelikde beýannama kabul etdiler. Onda soňra, iki ýurduň liderleri Şawkat Mirziýoýew bilen Sadyr Japarow Kuksaroý köşgündäki Hormatly myhmanlar seýilgähinde agaç ekdiler.
Gyrgyzystanyň Prezidentiniň Özbegistana eden resmi iş saparynyň çäginde — şu ýylyň 11-nji martynda Daşkent şäherindäki Tehnoparkda Özbek-Gyrgyz Işewürler Forumynyň we Işewürler Geňeşiniň ilkinji ýygnagy geçirildi.
Düýn — 12-nji martda Şawkat Mirziýoýew bilen bilelikde Sadyr Japarow Daşkentdäki Tehnoparka baryp, Özbegistanda öndürilen önümleriň sergisi bilen tanyşdy. Özbek Lideri gyrgyz kärdeşi bilen sergide görkezilen Özbegistanda öndürilen ulaglara syn eden mahaly, özbek halkynyň adyndan Gyrgyzystana 20 sany «Volkswagen Caddy» we «Isuzu D-Max» tiz kömek ulaglarynyň sowgat edilendigini aýtdy.
Şeýle hem, düýn Gyrgyzystanyň Prezidenti Özbegistanyň Beýik Mejlisiniň iki palatasynyň ýolbaşçylary we Premýer-ministr Abdulla Aripow bilen duşuşdy we iki ýurduň arasyndaky hoşniýetli hyzmatdaşlygyň ileri tutulýan ugurlaryny ara alyp maslahatlaşdy.
Şeýlelikde, Gyrgyzystanyň Prezidenti Sadyr Japarowyň Özbegistana eden resmi iş sapary tamamlandy.
