Girmek
«Sportbox»-yň habaryna görä, Aziýanyň Olimpiýa Geňeşi 2022-nji ýylda geçiriljek Aziýa oýunlarynyň resmi maksatnamasyna elektron sportuň hem goşulýandygyny resmi taýdan yglan etdi.
Maglumatlara görä, elektron sport boýunça ýaryşlarda gazanylan medallar ýurtlaryň umumy reýtingine täsirini ýetirer.
Elektron sport Aziýa oýunlaryna ilkinji ädimini 2018-nji ýylda Indoneziýanyň paýtagty Jakartada geçirilen Oýunlarda ädipdi. Şol oýunlarda elektron sportuň League of Legends, Hearthstone, Arena of Valor, PES 2018, StarCraft II we Clash Royale görnüşleri boýunça ýaryşlar geçirildi.
Elektron sport boýunça ýaryşlaryň 2017-nji ýylda Aşgabatda geçirilen Ýapyk binalarda we söweş sungaty boýunça V Aziýa oýunlarynyň maksatnamasyna hem goşmaça görnüş hökmünde girizilendigini ýatladýarys.
2022-nji ýyldaky Aziýa oýunlarynyň maksatnamasy dolulygyna biraz soňra yglan ediler. Oýunlaryň elektron sport boýunça ýaryşlaryna Türkmenistanyň hem wekilçilik edýän Aziýanyň elektron sport federasiýasy (AESF) gözegçilik eder.