Tapgyryň umumy aýratynlygy:
Ýekeje täze golçy: Möwsümde tapawutlanan futbolçylaryň sanawyna bu tapgyrda ýekeje futbolçy goşuldy. Ol hem «Energetikden» Begenç Temriýewdir.
88 golçy: Şeýlelikde, möwsümde tapawutlanan futbolçylaryň sany 88-e çykdy.
12 gol: Tapgyrda derwezelere 12 pökgi girizildi. Mundan ozal 7, 12 we 20-nji tapgyrlar 12 gol bilen tamamlanypdy.
238 gol: Möwsümde geçirilen pökgüleriň sany 238-e çykdy.
“Energetik” – “Köpetdag” – 1:3
Gollar: 77 Begenç Temriýew ― 15 Şiri Annaýew, 55,57 Döwletmyrat Seýitmuhammedow.
Bäşinjilige şärik: Möwsümdäki 6-njy pökgüsini geçiren Döwletmyrat Seýitmuhammedow iň netijeli futbolçylaryň sanawynda «Şagadamdan» Baýramgeldi Nurlyýew bilen birlikde bäşinji orna şärik boldy.
«Köpetdagyň» üçünjisi: «Köpetdagyň» düzüminde Ýokary ligada geçiren pökgüleriniň sanyny 13-e çykaran Döwletmyrat Seýitmuhammedow toparda iň köp tapawutlanan futbolçylaryň sanawynda üçünji orna çykdy. Sanawyň başyny 16 gol bilen Öwezbaý Muhammetmyradow çekýär, 14 golly Berdi Hotdyýew bolsa ikinji orny eýeleýär.
14-nji dublçy: Döwletmyrat Seýitmuhammedow möwsümde bir duşuşykda iki pökgi geçirip bilen 14-nji futbolçy boldy.
“Aşgabat” – “Şagadam” – 1:0
Gol: 78 Nazar Towakelow.
Bellik: Duşuşygyň 2-nji minutynda “Aşgabat” toparynyň oýunçysy Nazar Towakelow 11 metrlik jerime urgusyny nädürs ýerine ýetirdi.
Ilkinji dörtlükde: Möwsümdäki 7-nji pökgüsini geçiren Nazar Towakelow iň netijeli futbolçylaryň sanawynda ilkinji dörtlüge girdi. Ol dördünji orny «Şagadamdan» Hemra Amanmämmedow bilen paýlaşýar.
Ýokary ligadaky 10-njy gol: Biziň şahsy hasaplamalarymyza görä, Nazar Towakelow Ýokary ligadaky 10-njy goluny geçirdi.
«Aşgabadyň» 10-lugynda: Ýokary ligada «Aşgabadyň» düzüminde 10-njy pökgüsini geçiren Nazar Towakelow 2013-nji ýyldan bäri paýtagtyň adybir topary bilen iň kän tapawutlanan futbolçylaryň ilkinji 10-lugyna girdi.
“Nebitçi” – “Ahal” – 1:2
Gollar: 53 Azat Garajaýew ― 65 Elman Tagaýew, 68 Murat Ýakşiýew.
Bombardir 15 tapgyrdan soňra tapawutlandy: Karýerasyna Türkmenistanyň çempionatynyň iň netijeli futbolçysy bolmak başarnygyny iki gezek sygdyryp bilen Myrat Ýagşyýew bu ýyl garaşylan oýny görkezmekde kynçylyk çekýär. Ol möwsümde 15 tapgyrdan soňra ýene-de tapawutlandy. Hüjümçi çempionatdaky iň soňky pökgüsini mundan ozal 7-nji tapgyrda geçiripdi.
Bir toparda 20 gol: Şahsy hasaplamalarymyza görä, Azat Garajaýew 2013-nji ýyldan bäri çempionatda «Nebitçiniň» düzüminde 20-nji goluny geçirdi. Ol bu netije bilen şol möwsümden bäri toparda tapawutlanyp gelýän futbolçylaryň arasynda ilkinji dörtlüge girdi.
800-nji utuk: Gazanylan bu ýeňiş bilen «Ahal» Ýokary ligada jemi toplan utuklaryny 801-e çykardy. Sait Seýidowyň şägirtleri bu netije bilen Ýokary liganyň taryhynda iň köp utuk toplan toparlaryň arasynda 5-nji orny eýeleýär.
Ýokary ligada arakesmeler bilen çykyş eden «Ahalyň» iň köp utuk toplan bilen möwsümi 2014-nji ýyl boldy. Şol ýyl kümüş medala mynasyp bolan topar 87 utuk toplap taryhynyň rekordyny goýdy. Toparyň iň şowsuz ýyly bolsa 2002-nji ýyldyr. Şol ýyl «Ahal» möwsümi bary-ýogy 9 utuk bilen tamamlady.
Ýokary ligada 20-nji möwsümini geçirýän «Ahal» şol möwsümleriň birinde 80-den, ikisinde 70-den, dördüsinde 60-dan kän utuk toplap bildi.
“Merw” – “Altyn Asyr” – 1:3
Gollar: 50 Pirmyrat Gazakow ― 63 (11 m.j.u.), 66 Altymyrat Annadurdyýew, 69 Mihail Titow.
60 golly ilkinji topar: Bu netijeden soňra «Altyn asyr» möwsümde geçiren gollarynyň sanyny 60-a tegeledi. Şeýlelikde, «aragatnaşykçylar» şu möwsümde 60 pökgi geçiren ilkinji topar boldy. Ýaryş tertibinden hem görnüşi ýaly, geçirilen gollaryň sany boýunça iň ýakyn bäsdeş bolan «Ahalyň» futbolçylary möwsümde 39 gezek tapawutlanyp bildiler.
Tapgyr bäş duşuşyga ýetdi: Altymyrat Annadurdyýew Ýokary ligasynyň soňky bäş duşuşygynda yzygiderli tapawutlanyp gelýär. Ol şu möwsümde muny başaryp bilen ilkinji futbolçydyr. Ýeri gelende aýtsak, möwsümdäki gollarynyň sanyny 25-e çykaran hüjümçi şolaryň 8-sini soňky bäş duşuşykda geçirdi.
25-nji pökgi: Möwsümiň iň netijeli futbolçysy Altymyrat Annadurdyýew gollarynyň sanyny 25-e çykardy. Ol ikinji orundaky Elman Tagaýewden 12 pökgi öňdedir.
Ýokary liganyň 7-liginde: Karýerasynda mundan ozal bir möwsümde 22 pökgi geçirip gören futbolçy Altymyrat Annadurdyýew Ýokary liganyň taryhynda hem bir möwsümde iň kän pökgi geçirenleriň arasynda edil häzir 9-njy orunda. Ýeri gelende aýtsak,
1992-nji ýylda Sergeý Kazankow (TSHT), 1995-nji ýylda Rejepmyrat Agabaýew («Nisa») ― 41,
2001-nji ýylda Didargylyç Urazow («Nisa») ― 32,
2015-nji ýylda Myrat Ýagşyýew («Nebitçi») ― 31,
2005-nji ýylda Berdi Şamyradow (HTTU), 2016-njy ýylda Süleýman Muhadow («Altyn asyr») ― 30,
1998-nji ýylda ýene-de Rejepmyrat Agabaýew («Nisa»), 2014-nji ýylda Mämmedaly Karadanow («Şagadam») we 2017-nji ýylda Myrat Ýagşyýew («Altyn asyr») ― 28,
2013-nji ýylda Mämmedaly Karadanow («Nebitçi») ― 26 pökgi geçirip, möwsümiň iň netijeli futbolçysy boldular. Altymyrat Annadurdyýew bolsa ýedinji orny 1993-nji ýylyň iň netijeli futbolçy Berdimyrat Nurmyradow («Köpetdag») bilen paýlaşýar. Öňde ýene alty tapgyr bar. Belki, hüjümçi has ýokarky basgançaklaryň birine çykyp biler.
Bäşinji jerime urgusy: Möwsüme 11 metrlik urgularynyň bäşisini dürs ýerine ýetiren Altymyrat Annadurdyýew bu sanawda hem iň ýokary netijäni görkezýär. 7, 12, 13, 19-njy tapgyrlardaky dürs jerime urgularyndan soňra ol 22-nji tapgyrda hem gowy netije görkezdi. Dürs jerime urgularynyň sany boýunça A.Annadurdyýewe iň ýakyn futbolçy dört gol bilen «Ahaldan» Elman Tagaýewdir. Ýeri gelende, Altymyrat Annadurdyýewiň şu möwsümiň 1-nji tapgyryndaky 11 metrlik jerime urgusynyň dürs bolmandygyny hem aýtmak gerek.
Titow ― üçünji orunda: Möwsümde 9-njy pökgüsini geçiren Mihail Titow iň netijeli futbolçylaryň sanawynda üçünji orna çenli göterildi. Ýöne ol bu orny häzir «Şagadamdan» Yhlas Magtymow bilen paýlaşýar. Iň netijeli hüjümçileriň başyny 25 pökgi bilen Altymyrat Annadurdyýewiň çekýändigini, «Ahaldan» Elman Tagaýewiň bolsa 13 pökgi bilen ikinji orunda barýandygyny ýatladýarys.
Bäşinji goşa: Altymyrat Annadurdyýew möwsümde bäşinji gezek bir duşuşykda iki gezek tapawutlanyp bildi. Futbolçynyň 12-nji tapgyrda dört gezek tapawutlanandygyny hem ýatladýarys.
