Türkmenistanyň Ministrler Kabinetiniň Başlygynyň orunbasary Guwanç Agajanow Pekin şäherinde Hytaýyň Milli nebit-gaz korporasiýasynyň («CNPC») başlygy Daý Houlýan bilen duşuşdy. Taraplar tebigy gaz pudagynda hyzmatdaşlygy pugtalandyrmak boýunça giňişleýin pikir alyşdylar.

G. Agajanow Türkmenistan bilen Hytaýyň arasyndaky tebigy gaz hyzmatdaşlygynyň strategik häsiýete eýedigini we munuň iki ýurduň Liderleri üçin uly ähmiýete eýedigini belledi. Iki tarap bilelikde «Amyderýanyň sag kenary» taslamasy we «Merkezi Aziýa — Hytaý» gaz geçirijisi ýaly nusgalyk energetika hyzmatdaşlyk taslamalaryny gurdular. Bu taslamalar Türkmenistanyň ykdysady we durmuş taýdan durnukly ösmeginde möhüm orun eýeledi.

Bellenilişi ýaly, «CNPC» taslamalaryň gurluşygy üçin döwrebap çözgütleri we tehniki hyzmat goldawyny üpjün edýän, tehnologik taýdan ygtybarly we ynamdar hyzmatdaşdyr. Şunuň bilen baglylykda, wise-premýer Agajanow iki tarapyň hem tebigy gaz pudagynda hyzmatdaşlygy çuňlaşdyrmaga dowam etjekdigine, bilelikde senagat ösüşine ýardam berjekdigine, gazanylan üstünlikleri paýlaşyp, dostluk köprülerini gurjakdygyna we iki ýurduň halklarynyň abadançylygyny ýokarlandyrmaga täze goşant goşjakdygyna ynam bildirdi.

Daý Houlýan iki ýurduň döwlet Baştutanlarynyň strategik tabşyryklary netijesinde Hytaý — Türkmenistan energetika hyzmatdaşlygynyň berk binýadynyň we giň mümkinçilikleriniň bardygyny aýtdy. «CNPC» tarapyndan iki ýurduň döwlet Baştutanlarynyň arasynda gazanylan ylalaşyklaryň işjeň durmuşa geçirilýändigi bellenildi. Nygtalşy ýaly, iki tarapyň serişdeler we bazar mümkinçilikleri türkmen-hytaý tebigy gaz hyzmatdaşlygynyň yzygiderli çuňlaşdyrylmagyna we berkedilmegine ýardam berýär. Bu bolsa Hytaý bilen Türkmenistanyň arasyndaky hemmetaraplaýyn strategik hyzmatdaşlygy çuňlaşdyrmaga we ikitaraplaýyn energetika gatnaşyklaryny has ýokary derejä çykarmaga goşant bolar.

Duşuşyga «CNPC-niň» wise-prezidentleri Çžan Daoweý we Sun Daýun, baş geňeşçi Çžao In we baş dolandyryjynyň kömekçisi Li Sýan hem gatnaşdylar.