Merkezi Aziýa ýurtlarynyň we Beýik Britaniýanyň daşary işler ministrleri ilkinji gezek CA5+1 görnüşindäki gepleşikleri 26-njy fewralda Londonda geçirerler. Taraplar maliýe bazarlary, infrastruktura, ulag, sanly hyzmatlar we möhüm peýdaly minerallar babatynda hyzmatdaşlygy ara alyp maslahatlaşarlar — diýip, «Kazinform» habar berýär.

Gepleşikler Gazagystany, Gyrgyzystany, Täjigistany, Türkmenistany we Özbegistany birleşdirýän «Merkezi Aziýa Plýus» diplomatik platformasynyň çäklerinde geçiriler. Beýik Britaniýa bu formata täze gatnaşyjy hökmünde goşulýar. Bu formaty ABŞ, Ýewropa Bileleşigi, Russiýa, Hytaý we Ýaponiýa hem ulanýarlar.

«Gepleşikler hyzmatdaşlygy çuňlaşdyrmagyň we anyk başlangyç taslamalary işe girizmegiň çalt ösüşe ýardam edijisi bolmaga gönükdirilendir» — diýlip, habarda bellenilýär.