5-nji fewralda Aziýanyň Olimpiýa geňeşi (AOG) 2029-njy ýylda Gazagystan Respublikasynyň Almaty şäherinde 10-njy Aziýanyň Gyşky oýunlaryny geçirmek barada kabul ediji şäher bilen şertnama gol çekişmek dabarasyny geçirdi. Dabara Italiýanyň Milan şäherinde geçirildi.

Şertnama gol çekişmek dabarasyna Aziýanyň Olimpiýa geňeşiniň prezidenti şeýh Joan bin Hamad Al Tani, şeýle hem Halkara olimpiýa komitetiniň agzalary, halkara we yklym federasiýalarynyň prezidentleri hem-de wekilleri, ýokary derejeli resmi adamlar we milli olimpiýa komitetleriniň wekilleri gatnaşdylar. Şertnama Aziýanyň Olimpiýa geňeşi bilen Gazagystan Respublikasynyň Milli olimpiýa komitetiniň arasynda, yklym derejesindäki sport çäresini geçirmek üçin tassyklanan institusional düzgünleriň çäklerinde baglaşyldy.

Aziýanyň Olimpiýa geňeşiniň prezidenti şertnamanyň gol çekilmeginiň guramanyň Aziýada gyşky sport görnüşlerini ösdürmäge bolan ygrarlylygyny görkezýändigini belledi. Şeýle-de ol Aziýanyň Gyşky oýunlarynyň bu yklymyň sportyny ähli derejelerde ösdürmek baradaky AOG-nyň garaýşyna laýyklykda milli olimpiýa komitetleriniň arasynda hyzmatdaşlygy we jebisligi berkitmek üçin möhüm meýdança bolup hyzmat edýändigini nygtady.

Almaty 2029 Aziýanyň Gyşky oýunlary bu çäräniň onunjy gezek geçirilmegi bolar. Bu oýunlara yklymyň ähli künjeklerinden ýurtlaryň giň gerimde gatnaşmagyna garaşylýar, bu bolsa Aziýanyň gyşky sport görnüşlerindäki barha artýan ornuny hem-de guramaçylyk we tehniki düzümleriň yzygiderli ösdürilýändigine şaýatlyk edýär.