Girmek
S7 Airlines awiakompaniýasy «Nowosibirsk – Aşgabat» täze ugry boýunça biletleriň satuwyny açdy. Uçuşlar hepdede bir gezek — sişenbe güni, 2026-njy ýylyň 31-nji martyndan başlap amala aşyrylar.
«Nowosibirsk – Aşgabat» göni ugry boýunça uçuş Tolmaçýowo (OVB) howa menzilinden sagat 00:55-de uçup, Aşgabatda ýerli wagt bilen 03:00-da gonar. Ýoluň wagty 4 sagat 5 minut. Gatnawlar Airbus A320 uçarlarynda ýerine ýetirilýär.
Ýolagçylara «Standart» we «Plus» nyrhnamalary hödürlenýär, olar ýol goşlaryny alyp gitmek, biletleri çalşyp ýa-da yzyna gaýtarmak şertleri boýunça tapawutlanýar.
«Aşgabat – Nowosibirsk» ugry boýunça yzyna uçuş hem sişenbe güni amala aşyrylar. Uçuş sagat 04:30-da meýilleşdirilip, Nowosibirskde sagat 10:15-de gonar. Ýoluň wagty 3 sagat 45 minut.
Dürli nyrhnamalaryň çäklerinde ýolagçylara goşmaça hyzmatlar hödürlenýär: ýol goşlaryny alyp gitmek, oturgyjy sargyt etmek we hyzmatlaryň derejesini ýokarlandyrmak mümkinçiligi bar.
Mundan başga-da, S7 Airlines eýýäm «Moskwa – Aşgabat» ugry boýunça gatnawlary amala aşyrýar. Biletleriň häzirki bahasy we gatnawlar baradaky jikme-jik maglumatlary awiakompaniýanyň resmi saýtyndan bilip bolýar.