«Türkmengallaönümleri» döwlet birleşiginiň «Daşoguzgallaönümleri» önümçilik birleşiginiň Saparmyrat Türkmenbaşy etrabyndaky tüwi öndürýän kärhanasynda 2025-nji ýylyň on bir aýynda 15 müň tonnadan gowrak ýokary we birinji görnüşli tüwi taýýarlanyldy. Netijede, göz öňünde tutulan meýilnama artygy bilen berjaý edildi diýlip, «Türkmenistan» gazetinde habar berildi. 

Demirgazyk sebit boýunça şalynyň esasy ýetişdirilýän etrabynda 2015-nji ýylda ulanmaga berlen kärhanada häzirki wagtda tohumlyk şalynyň ýokary hil derejesinde taýýarlanylmagy üçin utgaşykly çäreler geçirilýär. 

Demirgazyk etrabyň şalyçylyga ýöriteleşdirilen S.Nyýazow adyndaky hem-de «27-nji oktýabr» daýhan birleşikleriniň kärendeçileri, hojalygy ýöretmegiň täze usullarynda işleýän ýer eýeleri 8 müň 100 gektar meýdandan 35 müň tonna golaý şaly öndürip, bu azyklyk önümiň bolçulygyny döretdiler.

Kärhananyň kämil enjamlar bilen üpjün edilen, howanyň zerur derejesi döredilen degişli ulgamynda şaly hasyly çygdan goralyp, amatly şertlerde aýawly saklanylýar. Sazlaşykly hereket edýän önümçilik bölümlerinde şaly bökdençsiz gaýtadan işlenilýär. Ýokary öndürijilikli önümçilik ulgamlarynda tüwiniň ýokary, birinji hem ikinji hilli görnüşleri, tüwi ýarmasy we uny öndürilýär. Etrap merkeziniň günorta künjeginde uly meýdany tutýan kärhananyň 30 müň tonna şalyny gaýtadan işleýän degirmeni, şonça mukdardaky şalyny aýawly saklamak üçin elewatory, tohumlyk şalyny arassalaýan hem-de saklaýan iki ammary bar.

Kärhana 8 bölümden ybarat bolup, bu ýerde 150-den gowrak adam zähmet çekýär. Häzirki döwrüň talaplaryna laýyklykda ýokary hilli önümleri taýýarlamagyň nusgasyny görkezýän kärhananyň çäginde 2 sany ýöriteleşdirilen dükan ýerleşýär. Olarda kärhanada öndürilen dürli görnüşli, ýokary hilli önümleriň söwdasy guralyp, sarp edijilere ýetirilýär.