Aşgabat atçylyk sport toplumynda güýzki at çapyşyk möwsüminiň jemleýji çapuwlary geçirildi. Şol gün bedewler dürli aralykdan on gezek çapuwa goşulyp, janköýerlerine toý şatlygyny getirdiler diýlip, «Türkmenistan» gazetinde habar berildi.

Güýzki möwsümiň ýapylyşy mynasybetli guralan at çapyşyklary ikiýaşar atlaryň 1000 metr aralykdaky ýaryşy bilen badalga aldy. Şeýlelikde, birinji çapyşykda ýeňiş ugrundaky ýaryş Türkmenistanyň Prezidentiniň Ahalteke atçylyk toplumyna degişli Gazaply atly al, Akylly atly dor atlaryň hem-de Alabahar diýen dor gysragyň arasynda boldy. Çapyşykda Türkmenistanyň at gazanan atşynasy M.Hojamuhammedowyň seýislän Gazaplysy (çapyksuwary P.Orazow) bellenen aralygy 1 minut 8,9 sekuntda geçip, iň gowy netijäni görkezdi.

Ikinji çapyşykda pellehana ilkinji bolup 1 minut 7,1 sekunt netije bilen «Nurana bedew» hususy kärhanasyna degişli bolan we B.Allanazarowyň ýaryşa taýýarlan hem-de geljegine uly umyt bildirilýän ýaş çapyksuwar Y.Allanazarowyň erk eden Aýsoltan diýen mele gysragy geldi.

Üçünji çapyşykda ýeňiş ugrundaky ýaryş Aşgabat şäheriniň Bagtyýarlyk etrabynyň «Akdaşaýak» ýaşaýyş jaý toplumyna degişli Atylar diýen dor at bilen M.Mätiýewiň hojalygyna degişli Messan diýen dor gysragyň arasynda boldy. Netijede, halypa seýis H.Babalyýewiň çapuwa taýýarlan we S.Atajanowyň çapyksuwarlyk etmeginde ýaryşa goşulan Atylar 1 minut 7,5 sekuntda pellehanadan geçip, çapyşygyň ýeňijisi boldy.

Dördünji çapyşykda-da ikiýaşar saýlama atlar 1000 metrden ýaryşa goşuldylar. Netijede, pellehana ilkinji bolup M.Bäşimnyýazowyň hojalygyna degişli M.Orazowyň seýislän we üçünji derejeli çapyksuwar B.Berdimuhammedowyň çapyksuwarlyk eden Düşümli atly gurt mele gysragy geldi. Ol bellenilen aralygy 1 minut 9 sekuntda geçmegi başardy.

1600 metr aralyga guralan bäşinji çapyşykda Türkmenistanyň Prezidentiniň Ahalteke atçylyk toplumyna degişli, Türkmenistanyň ussat halypa çapyksuwary A.Muhammedowyň seýislän we M.Kiçigulowyň erk eden Babyr diýen gara aty 1 minut 51,2 sekunt netije bilen pellehana ilkinji geldi.

Altynjy çapyşykda üçýaşar gysraklar üçin badalgadan pellehana çenli aralyk 1800 metre deň boldy. Bu çapyşykda Türkmenistanyň Prezidentiniň Ahalteke atçylyk toplumyna degişli, Türkmenistanyň at gazanan atşynasy M.Agamyradowyň çapuwa taýýarlan we Ş.Saryýewiň çapyksuwarlyk eden Mejally diýen mele gysragy 2 minut 7,3 sekunt netije bilen pellehana ilkinji bolup geldi. Mejallynyň esasy garşydaşy Akýyldyz diýen mele gysrak hem edil şol netijäni görkezdi.

Ýedinji çapyşykda «Türkmenstandartlary» baş döwlet gullugyna degişli, ussat seýis G.Agamyradowyň seýislän we B.Babaýewiň erk eden Ýadygär II diýen gyr aty pellehana ilkinji geldi. Sekizinji çapyşykdan başlap, dört we ulyýaşar atlar çapuwa goşuldylar. Şeýlelikde, 1800 metr aralykdan ýaryşa goşulan bedewleriň arasynda Türkmenistanyň Prezidentiniň Ahalteke atçylyk toplumyna degişli bolan Gajar diýen dor at tapawutlanmagy başardy. Gajary Türkmenistanyň at gazanan atşynasy M.Agamyradow ýaryşa taýýarlapdyr. Oňa erk eden çapyksuwar R.Agamyradow.

Dokuzynjy çapyşykda aýlaw baglan dört we ulyýaşar atlar üçin badalgadan pellehana çenli aralyk 2200 metre deň boldy. Şeýlelikde, bu çapyşyk Türkmenistanyň Prezidentiniň Ahalteke atçylyk toplumyna degişli, Türkmenistanyň at gazanan atşynasy Ş.Agamyradowyň seýislän we ussat çapyksuwar B.Agamyradowyň erk etmeginde çapuwa goşulan Goçýigit diýen dor atyň ýeňşi bilen tamamlandy.

Möwsümiň ýapylyşy mynasybetli guralan bäsleşigiň jemleýji çapyşygynda dört we ulyýaşar saýlama bedewler 2200 metr aralykdan ýaryşa goşuldylar. Çapyşykda Türkmenistanyň Prezidentiniň Ahalteke atçylyk toplumyna degişli bolan Dagbedew möwsümi ýeňiş bilen jemledi. Türkmenistanyň at gazanan atşynasy M.Agamyradowyň seýislän hem-de ussat çapyksuwar T.Babaýewiň erk etmeginde ýaryşa goşulan Dagbedew bellenilen aralygy 2 minut 32,4 sekuntda geçmegi başardy.