Türkmenistanyň woleýbol boýunça erkekler ýygyndysy Bangladeşiň paýtagty Dakka şäherinde tamamlanan «CAVA Cup for Men 2025» halkara woleýbol ýaryşynda ýeňiş gazandy. Türkmen türgenleri bu ýaryşda bir oýunda-da ýeňilmän, finalda Owganystanyň toparyny 3:2 hasaby bilen ýeňdi.

Ýaryşa jemi alty topar gatnaşdy: Türkmenistan, Bangladeş, Nepal, Maldiwler, Şri-Lanka we Owganystan. Toparçalaýyn tapgyrda türkmenistanly türgenler Nepaly 3:0, Şri-Lankany 3:1, Owganystany 3:1 we Maldiwleri 3:0 hasaby bilen ynamly ýeňmegi başardylar. Şeýle-de bu ýaryşda Türkmenistanyň ýygyndysy özüniň ýeke-täk çynlakaý garşydaşy bolan Bangladeşiň toparyny 3:2 hasaby bilen ýeňdi.

Final duşuşygy Owganystan bilen dartgynly ýagdaýda geçdi. Türkmen woleýbolçylary iki gezek hasaby deňlemäge mejbur boldular (2:2). Türkmenistanyň ýygyndysy aýgytlaýjy bäşinji setde 1:6 hasaby bilen yza galan hem bolsalar, duşuşygyň barşyny özlerine tarap öwürmegi başaryp, ýeňiş gazandylar.

Ýaryşyň netijeleri boýunça Türkmenistanyň ýygyndysynyň iki oýunçysy aýratyn tapawutlandy: Bagtyýar Hemragulyýew ýaryşyň iň gowy hüjümçisi, Akmyrat Döwletow bolsa iň gowy baglanyşygy üpjün ediji oýunçy hökmünde ykrar edildi.

Bu ýeňişli çykyşy Türkmenistanyň ýygyndysyna 2026-njy ýylda geçiriljek Aziýanyň woleýbol boýunça çempionatyna gatnaşmak hukugyny gazandyrdy — diýip, «Neýtralnyý Turkmenistan» gazeti habar berýär.