Gazagystanyň Türkmenistandaky ilçihanasy beýik gazak şahyry, akyldary we magaryfçysy Abaý Kunanbaýewiň doglan gününiň 180 ýyllygyna bagyşlanan dabaraly medeni agşam geçirdi. Konsert Magtymguly adyndaky milli sazly-drama teatrynyň sahnasynda geçirilip, oňa Türkmenistanyň medeniýet we jemgyýetçilik durmuşynyň wekilleri gatnaşdylar diýip, «Türkmenistan: Altyn asyr» saýty habar berýär.

Sahnada Gazagystandan gelen döredijilik toparlary — Dina Nurpeisowa adyndaky halk saz gurallary boýunça akademiki orkestr hem-de welaýat filarmoniýasynyň «Inju-maržan» horeografik ansambly çykyş etdiler.

Myhmanlara gutlag sözi bilen çykyş eden Gazagystanyň Türkmenistandaky ilçisi Nurlan Nogaýew Abaýyň döredijiliginiň Merkezi Aziýa halklarynyň ruhy ösüşindäki aýratyn ähmiýetini belläp, beýik akyldaryň ýubileýiniň iki ýurduň arasyndaky medeni gatnaşyklary pugtalandyrmaga mümkinçilik berendigini nygtady.

«Abaýyň ady halklarymyzyň ýüreklerini birleşdirýär. Onuň ynsanperwerlik, adalat we magaryf baradaky pikirleri häzirki döwürde-de öz ähmiýetini ýitirmändir. Bu konsertiň dostlugy, medeniýeti we özara hormaty ýokary gymmatlyklaryň biri hasaplanýan türkmen topragynda geçirilýändigine biz buýsanýarys» diýip, diplomat aýtdy.

Konsertiň dowamynda gazak halk we klassik sazlary ýerine ýetirildi, şol sanda Abaýyň küýleri — dombra ýa-da gopuz üçin döredilen saz eserleri hem ýerine ýetirildi. «Inju-maržan» ansambly iki ýurduň milli öwüşginli tanslaryny görkezdi. Şeýle-de doganlyk halklaryň ruhy ýakynlygyny alamatlandyrýan türkmen kompozitorlarynyň sazlary diňlenildi.

Teatryň eýwanynda şahyryň durmuşyna we döredijiligine bagyşlanan tematiki sergi guraldy. Onda kitaplar, seýrek neşirler we suratlar görkezildi.

Saparyň çäklerinde gazak wekiliýeti Aşgabatda ýerleşýän Abaý Kunanbaýewiň ýadygärligine gül goýdy, şeýle hem sungat we medeniýet ulgamynda hyzmatdaşlygyň geljegini ara alyp maslahatlaşmak maksady bilen Türkmenistanyň medeni we bilim edaralarynyň wekilleri bilen duşuşyklary geçirdi.