Aziýanyň futbol konfederasiýasy (AFK) Şri-Lankanyň milli ýygyndysynyň Türkmenistana garşy öňde boljak myhmançylykdaky duşuşygyny Günorta Aziýa topary üçin «synag» diýip atlandyrdy. Bu barada AFK-nyň metbugat gullugy tarapyndan neşir edilen habarda aýdylýar.

Türkmenistanyň Şri-Lanka bilen üçünji tapgyryň myhmançylykda geçiren duşuşygynda 0:1 hasaby bilen ýeňilenden soň, D toparçasynda bäsdeşlik iň ýokary derejä ýetdi. AFK-nyň maglumatyna görä, 67-nji minutda Leon Pereýra tarapyndan geçirilen ýeke-täk gol Şri-Lankanyň Türkmenistan bilen utuk sanyny deňleşdirdi we Taýlandy hem göreşmeklige gaýdyp getirdi – häzir üç ýygyndy hem üç duşuşykdan soň 6 utuk toplady.

AFK-nyň habarynda nygtalyşy ýaly, eger-de Şri-Lankanyň ýygyndysy Aziýanyň Kubogynyň final tapgyryna öz taryhynda ilkinji gezek gatnaşmak mümkinçiligini saklamak isleýän bolsa, bu topar Türkmenistana garşy myhmançylykdaky duşuşygyny üstünlikli geçirmelidir.

Geçen oýundaky ýeňlişe garamazdan, Türkmenistanyň milli ýygyndysy D toparçasynda goşmaça görkezijiler boýunça öňdeligi saklaýar. Öýde oýnaljak duşuşykdaky gurşawyň we janköýerleriň goldawynyň türkmen ýygyndysyndan ýeňiş gazanyp, haklaşmagyna hem-de liderlik ornuny pugtalandyrmagyna ýardam etmegine garaşylýar.

Ýatladyp geçsek, Türkmenistan bilen Şri-Lankanyň arasyndaky duşuşyk 14-nji oktýabrda Arkadag şäherindäki stadionda geçiriler we ol ýerli wagt bilen sagat 18:45-de başlanar.

Şeýle hem sişenbe güni D toparçanyň çäklerinde Taýlandyň milli ýygyndysy Hytaý Taýbeýine garşy myhmançylyk duşuşygyny geçirer.

Aziýa Kubogy–2027 Saud Arabystanynda 7-nji ýanwardan 5-nji fewrala çenli geçiriler. Bu ýaryşa yklymyň iň güýçli 24 milli ýygyndysy gatnaşar.