Girmek
Türkmenistan Owganystan boýunça Moskwa formatynyň ýedinji mejlisine gatnaşar. Bu barada Russiýa Federasiýasynyň DIM-iniň resmi wekili Mariýa Zaharowanyň sözlerine salgylanyp, TASS ýazýar.
Mariýa Zaharowanyň aýtmagyna görä, Owganystan boýunça Moskwa formatynyň ýedinji mejlisi 7-nji oktýabrda geçirilip, oňa Owganystanyň, Hindistanyň, Eýranyň, Gazagystanyň, Hytaýyň, Gyrgyzystanyň, Pakistanyň, Russiýanyň, Täjigistanyň, Türkmenistanyň we Özbegistanyň ýörite wekilleri hem-de ýokary derejeli wekilleri gatnaşarlar.
Bellenilişine görä, mejlise Russiýanyň daşary işler ministri S.Lawrowyň hem-de Owganystanyň daşary işler ministri Amir Han Mottakiniň gatnaşmagy göz öňünde tutulýar.
«Esasy üns Owganystanyň milli barlyşyk prosesine goldaw bermek meselesine hem-de sebitiň döwletleriniň owgan tarapy bilen syýasy, ykdysady, terrorçylyga we neşe serişdeleriniň bikanun dolanyşygyna garşy göreş ýaly ugurlarda işjeň hyzmatdaşlygyny giňeltmek meselelerine gönükdiriler. Şeýle hem mejlisiň netijeleri boýunça bilelikdäki beýannama kabul edilmegi meýilleşdirilýär» diýip, M.Zaharowa maglumat berdi.