Russiýanyň «Rossotrudniçestwo» edarasynyň Türkmenistandaky wekilhanasy oktýabr aýy üçin medeni we bilim çäreleriniň giňişleýin maksatnamasyny taýýarlady — diýip, edaranyň metbugat gullugy habar berýär.

Oktýabr aýynyň dowamynda «Rus öýünde» bilim seminarlary, döredijilik agşamlary, ussatlyk sapaklary hem-de Russiýanyň ýokary okuw mekdepleriniň açyk gapylar günleri geçiriler. Ähli çäreler tölegsiz esasda guralýar.Aýyň esasy wakalarynyň arasynda 9–12-nji oktýabr aralygynda geçiriljek Russiýanyň ýokary okuw mekdepleriniň bilim sergisi, Sergeý Ýeseniniň doglan gününiň 130 ýyllygyna bagyşlanan edebi-sazly agşam (3 oktýabrda), şeýle hem Russiýada Ylym we tehnologiýalar onýyllygyna bagyşlanan aň-paýhas kwiz-bäsleşigi (24 oktýabrda) bar.

Yzygiderli esasda «Rus dilinde ýönekeý, batyrgaý, erkin gürle!» atly dil sapaklary, çagalar üçin şekillendiriş sungaty boýunça sapaklar, döwrebap žurnalistika boýunça okuw sapaklary, şeýle-de «Kalply marketing» atly leksiýalar geçiriler.Uly synplaryň okuwçylary üçin Russiýanyň öňdebaryjy ýokary okuw mekdepleriniň — Russiýanyň döwlet ynsanperwer uniwersitetiniň, Demirgazyk döwlet lukmançylyk uniwersitetiniň, Ýokary ykdysadyýet mekdebiň we Milli barlag ýadro uniwersitetiniň ýanyndaky Moskwanyň inžener-fizika institutynyň onlaýn görnüşdäki açyk gapylar günleri guralar. Şeýle hem RF-nyň hökümetiniň 2026/2027 okuw ýyly üçin bölüp berýän kwotasynyň esasynda Russiýada bilim almak bilen baglanyşykly hepdelik okuw-seminarlary we maslahatlar meýilleşdirilýär.

17-nji oktýabrda CODDY halkara programmirleme mekdebi bilen bilelikde robototehnika boýunça ussatlyk sapagy, 12-nji oktýabrda bolsa M. W. Lomonosow adyndaky Demirgazyk (Arktika) federal uniwersiteti bilen inžener tehnologiýalary we 3D çap etmek boýunça okuw sapaklary geçiriler.Çärelere gatnaşmak üçin öňünden ýazylmak zerurdyr. Habarlaşmak üçin: otdel_tm@mail.ru ýa-da şu telefon belgileri (+993 63) 47 11 92, (+993 63) 42 67 51.

«Rus öýi» Aşgabat şäheriniň Saparmyrat Türkmenbaşy şaýoly, jaý 11 salgysynda ýerleşýär.