Türkmenistanyň Prezidenti Serdar Berdimuhamedow «Ýaňlan, Diýarym!» telebäsleşiginiň jemleýji tapgyryna gatnaşyjylara Gutlag iberdi.

«Türkmenistan» gazetinde çap edilen Gutlagynda döwlet Baştutany şeýle belleýär:

«Garaşsyz ýurdumyzyň ýaş aýdymçy ýigitleri we gyzlary!

Hormatly ýaşlar!

Sizi Halkara parahatçylyk we ynanyşmak ýylynda «Ýaňlan, Diýarym!» telebäsleşiginiň jemleýji tapgyryna gatnaşmagyňyz mynasybetli tüýs ýürekden gutlaýaryn. Size Garaşsyz, hemişelik Bitarap Watanymyzda amala aşyrylýan beýik özgertmeleri, ýurdumyzyň dünýä bileleşigindäki belent at-abraýyny, ajaýyp döwrümizi, halkymyzyň bagtyýar durmuşyny joşgunly wasp edýän kämil aýdym-sazlary döretmekde mundan beýläk-de uly üstünlikleri arzuw edýärin.

Berkarar döwletiň täze eýýamynyň Galkynyşy döwründe ýurdumyzyň ähli ulgamlarynda iri möçberli döwlet maksatnamalary üstünlikli durmuşa geçirilýär. Garaşsyz Watanymyzy syýasy, ykdysady taýdan ösdürmek, täze medeni-durmuş maksatly binalary, senagat-önümçilik toplumlaryny, döwrebap ýaşaýyş jaýlaryny, ýol-ulag düzümlerini gurmak, halkymyzyň ýaşaýyş-durmuş derejesini has-da ýokarlandyrmak boýunça giň gerimli işler alnyp barylýar. Türkmen halkynyň Milli Lideri Gahryman Arkadagymyz tarapyndan başy başlanan beýik özgertmeleriň täze taryhy döwürde üstünlikli dowam etdirilmegi netijesinde ýurdumyzyň Aşgabat, Arkadag şäherlerinde, welaýatlarymyzda halkymyzyň bagtyýar durmuşda ýaşamagy, ýaş nesilleriň ylymly, bilimli şahsyýetler bolup ýetişmekleri, medeniýetimiziň we sungatymyzyň has-da ösdürilmegi ugrunda giň mümkinçilikler döredilýär.

Gadyrly höwesjeň aýdymçy ýaşlar!

Merdana ata-babalarymyz ençeme asyrlaryň dowamynda aýdym-saza uly ähmiýet beripdirler, sungatda synmaz güýjüň, mizemez erkiň bardygyna, onuň nesilleriň kalbynda ýagşy gylyk-häsiýetleri kemala getirýändigine ynanypdyrlar. Gadymy döwürlerden şu günlere gelip ýeten aýdym-sazlarymyzda halkymyzyň ruhy-ahlak gymmatlyklary, ýol-ýörelgeleri, belent adamkärçilik häsiýetleri jemlenendir. Pederlerimiz döwletli ojagynda, abadan ilinde ýaňlanýan aýdym-sazlary ruhy syrdaşyna, köňül penasyna öwrüpdirler, ony nesilden-nesle geçirip, häzirki döwrümize ýetiripdirler.

Türkmen halkynyň Milli Lideri Gahryman Arkadagymyz «Medeniýet halkyň kalbydyr», «Ile döwlet geler bolsa...», «Parahatçylyk sazy, dostluk, doganlyk sazy» atly kitaplarynda aýdym-saz sungatynyň halkymyzyň ýaşaýyş-durmuşynda uly orun tutýandygyny, türkmen halkynyň öz sungaty bilen dost-doganlyk, parahatçylyk ýörelgelerini dabaralandyrýandygyny çuňňur pähim-paýhas bilen beýan edýär. Türkmenistanyň hemişelik Bitaraplygynyň şanly 30 ýyllygy giňden bellenilýän Halkara parahatçylyk we ynanyşmak ýylynda milli aýdym-sazlarymyz üstünliklerimiziň mukamy bolup dünýä ýaýylýar, asudalygyň we agzybirligiň waspyna öwrülip, belentden ýaňlanýar.

Berkarar döwletimiziň halkara abraýy has-da belende göterilýän şanly ýylda Türkmenistanyň Prezidentiniň «Türkmeniň Altyn asyry» baýragyny almak ugrundaky bäsleşigiň çäklerinde geçirilýän «Ýaňlan, Diýarym!» telebäsleşiginiň jemleýji tapgyryna gatnaşmak we çykyş etmek siziň üçin uly bagtdyr, ömrüňiziň ýatdan çykmajak şatlykly wakalarynyň biridir.

Mähriban aýdymçy ýaşlar!

Hydyr Allanurow, Ýolaman Hummaýew, Nury Muhadow, Durdy Nuryýew, Gurban Kulyýew, Myrat Sadykow, Rejep Gutlyýew, Atda Çaryýew, Çary Hekimow ýaly halypalardan miras galan aýdym-sazlarymyz häzirki zaman türkmen aýdym-saz sungatynyň kämilleşmeginde möhüm ähmiýete eýedir. Olaryň döreden «Aşgabat», «Saýra, dutar!», «Daglar», «Daň şemaly», «Aýly agşam», «Duşurmazmy», «Dört örüm saçly», «Dillen, läläm!», «Gözleýän», «Oba gyzlary», «Halyçy gözel», «Gitme sen» ýaly ençeme aýdymlary halkyň hakydasynda baky orun aldy. Höwesjeň aýdymçy ýaşlarymyzyň geljekde ýüreklere ylham berýän, ajaýyp zamanamyzy, bagtyýar durmuşymyzy wasp edýän döwrebap aýdym-sazlary has-da joşgunly ýerine ýetirjekdiklerine, milli sungatymyzyň ösmegine öz mynasyp goşantlaryny goşjakdyklaryna berk ynanýaryn.

Ýaş aýdymçy ýigitler we gyzlar!

Sizi Halkara parahatçylyk we ynanyşmak ýylynda «Ýaňlan, Diýarym!» telebäsleşiginiň jemleýji tapgyryna gatnaşmagyňyz bilen ýene-de bir gezek tüýs ýürekden gutlaýaryn. Size berk jan saglyk, bagtyýarlyk, mundan beýläk-de döredijilik üstünliklerini arzuw edýärin».