Girmek
«Agzybirlik tilsimaty» bilelikdäki kärhanasy we «Aýdyň gijeler» hojalyk jemgyýeti tarapyndan jemi 137 müň 54 sany «Bilimli» atly noutbuk kompýuterleri öz wagtynda taýýarlanylyp, Aşgabat, Arkadag şäherlerindäki we welaýatlardaky degişli bilim edaralaryna gowşuryldy. Bu Türkmenistanyň Prezidentiniň 22-nji martynda gol çeken Kararyna laýyklykda, baglaşylan şertnama esasynda durmuşa geçirildi.
«Türkmenistan» gazetinde berilýän habara görä, noutbuk kompýuterleriniň deň ýarysyny — 68 müň 527-sini Türkmenistanyň Senagat we gurluşyk önümçiligi ministrliginiň bilelikdäki «Aýdyň gijeler» hojalyk jemgyýeti taýýarlady we olaryň 32 müň 276-sy Daşoguz welaýatynyň, 10 müň 731-si Balkan welaýatynyň, 25 müň 520-si Mary welaýatynyň degişli bilim edaralaryna ýollanyldy.
Kompýuterleriň galan ýarysyny taýýarlamak bolsa Türkmenistanyň Söwda we daşary ykdysady aragatnaşyklar ministrliginiň Kompýuter tilsimaty merkeziniň «Agzybirlik tilsimaty» bilelikdäki kärhanasynyň paýyna düşdi.
«Aýdyň gijeler» hojalyk jemgyýetiniň täze okuw ýylyna niýetläp taýýarlan kompýuterleriniň işleýjilik ukyby her ýylda artdyrylýar. Geçen ýyl olaryň operasion ulgamy Android 14.0 + Google service bolan bolsa, bu ýyl ony Android 15.0 + Google service ulgamyna çenli ýokarlandyryldy.
Noutbuklaryň operatiw ýadyny bolsa DDR4 4 Gb-dan DDR4 6 Gb-da çenli artdyryldy. Tor enjamlary barada aýdylanda, geçen ýyl ol Wi-Fi 802.11b/g/n we Bluetooth 4.0 bolan bolsa, bu ýylky noutbukda Wi-Fi 802.11b/g/n +BT we Bluetooth 4.0 görnüşdedir.
«Agzybirlik tilsimaty» bilelikdäki kärhanasy tarapyndan taýýarlanan noutbuklaryň 24 müň 376-sy Lebap welaýatynyň, 19 müň 543-si Ahal welaýatynyň, 7 müň 154-si Mary welaýatynyň, 16 müň 954-si Aşgabat şäheriniň, 500 sanysy bolsa Arkadag şäheriniň bilim edaralaryna iberilipdir.
«Bilimli» noutbuklarynyň programma üpjünçiligi hem özüniň ýokary derejesi bilen tapawutlanýar. Olarda çagalara oýun arkaly sanamagy we ýazmagy öwredýän, körpelere ýol hereketiniň howpsuzlyk kadalaryny ündeýän oýun görnüşindäki «Älemgoşar», «Kitaphana», «Döwlet nyşanlary», «English», «Elipbiý», «Meniň Watanym», «Şekilli aýdymlar» ýaly programmalar ornaşdyrylandyr.