Girmek
Germaniýa Federatiw Respublikasynyň Pakistandaky täze ilçisi hanym Ina Lepel 18-nji awgustda Türkmenistanyň Yslamabatdaky ilçihanasyna bardy. Bu barada Türkmenistanyň ilçihanasynyň resmi saýtynda habar berildi.
Türkmenistanyň ilçisi A.Möwlamow bilen bolan duşuşykda taraplar sebitleýin ösüş we umumy ileri tutulýan ugurlar barada netijeli söhbetdeşlik geçirdiler. Iki tarap hem durnuklylygy ýokarlandyrmak, parahatçylygy berkitmek we sebit hyzmatdaşlygyny giňeltmek ugrunda ygrarlydyklaryny mälim etdiler.
Habarda bellenilişi ýaly, Türkmenistanyň ilçisi hanym Ina Lepele Pakistan bilen Owganystanyň gatnaşmagynda Türkmenistan tarapyndan başlanan infrastruktura we energiýa taslamalary barada gürrüň berdi hem-de ykdysady ösüşi, sebitara baglanyşygy ösdürmek mümkinçiligine ünsi çekdi.
Ina Lepel hem öz gezeginde bu başlangyçlaryň strategiki ähmiýete eýedigini tassyklap, nemes kompaniýalarynyň bu başlangyçlaryň durmuşa geçirilmegine gatnaşmak üçin mümkinçilikleri gözleýändigini aýtdy.