Girmek
Türkmen döwlet neşirýat gullugy tarapyndan Türkmenistanyň Ylymlar akademiýasynyň Taryh we arheologiýa institutynyň alymlary Orazpolat Ekäýew bilen Rejep Jommyýewiň «Soltan Jelaletdin Menguberdi» atly kitaby neşir edildi. Bu barada «Türkmenistan» gazeti habar berýär.
Habarda bellenilişi ýaly, ömri watansöýüjiligiň, edermenligiň hem-de gaýduwsyzlygyň nusgasyna öwrülen ägirt şahsyýet soltan Jelaletdin Menguberdiniň geçen şöhratly ýolundan söhbet açýan täze kitap beýan ediliş usuly, taryhy maglumatlary, ylmy häsiýeti bilen okyjyny bada-bat özüne çekýär.
Kitabyň birinji baby «Türkmenleriň Horezmşalar — Anuşteginliler imperiýasynyň soltanlarynyň gysgaça beýany» diýlip atlandyrylýar. Onda tä Jelaletdine çenli imperiýanyň soltanlary hakynda maglumat berilýär.
Ikinji bapda Jelaletdiniň Çingiz hanyň goşunlary bilen alyp baran söweşleri beýan edilýär. Bapdan-baba gyzykly wakalary bilen okyjyny özüne çekýän kitabyň üçünji baby soltan Jelaletdiniň taryhy keşbiniň Muhammet an-Nesewiniň eserinde şöhlelendirilişi hakyndadyr.
Kitabyň dördünji babynda soltan Jelaletdiniň taryhy keşbiniň çeper eserlerde beýan edilişiniň teswiri bar.
Girişden, dört bapdan hem-de netijeden ybarat bu kitabyň üsti bilen okyjylar soltan Jelaletdin hakda köp gyzykly maglumatlary alyp bilerler.