Türkmen žurnalistleriniň topary Türkiýäniň Gara deňiz sebitiniň syýahatçylyk we medeni mümkinçiliklerini öwrenmek we beýan etmek maksady bilen üç günlük iş saparyny amala aşyrdy. Turkmenportalyň redaksiýasyndan bu sapara žurnalist Ýunus Allanazarow we operator Baýramgeldi Turşekow gatnaşdylar. Sapar Türkiýäniň Syýahatçylyk agentligi (TGA) tarapyndan Türkiýäniň Türkmenistandaky ilçihanasynyň we Turkish Airlines awiakompaniýasynyň goldaw bermegi bilen guraldy.

Trabzon: taryha we medeniýete aralaşmak

Syýahat Trabzon şäherine gelip, žurnalistleriň Mercure Trabzon Hotel myhmanhanasyna ýerleşmegi bilen başlandy. Maksatnamanyň utgaşdyryjysy Uraý Uzun tutuş saparyň dowamynda toparyň ýanynda boldy.

Birinji gün Trabzonyň taryhy ýadygärlikleri bilen tanyşmaklyga bagyşlandy. Wekiliýete Atatürk köşgüni - Türkiýe Respublikasynyň esaslandyryjysy Mustafa Kemal Atatürke şähere gelende sowgat hökmünde bagyş edilen binany görkezildi. Häzirki wagtda köşk respublikanyň ilkinji ýyllarynyň gurşawyny saklaýan muzeý bolup hyzmat edýär.

Iň täsirli ýadygärliklerden biri hem belent gaýanyň üstünde 1200 metr beýiklikde ýerleşýän Sümela monastyry (Sumela Manastırı) boldy. Wizantiýa imperiýasy döwründe IV asyrda bina edilen bu binagärlik toplumynyň beýikligi we syrly howasy myhmanlar üçin diýseň täsirli duýgulary galdyrdy.

Žurnalistler şeýle hem Akçaabat etrabyndaky osmanlylaryň gadymy öýleri saklanan Orta Mahalle etrapçasy ýerleşýän adaty binagarlik ýadygärligi bilen tanyşdylar we soňra musulmanlaryň mukaddes öýüne öwrülen öňki Wizantiýa ybadathanasy bolan Aýa-Sofýa metjidine (Ayasofya Camii) baryp gördüler.

Maksatnama laýyklykda türkmen žurnalistleriniň topary şeýle hem sebitiň köp medeniýetli mirasyny görkezýän Keramatly Mihail (Aziz Mikail) ybadathanasyna baryp gördüler.

Rizeniň çaý medeniýetine aralaşmak

Ikinji gün Gyzlar monastyryny (Kızlar Manastırı) görmek bilen başlandy. Bu ýer Keramatly Anna monastyry hökmünde hem tanalýar – ol gaýada ýonulyp döredilen VI asyrdaky gadymy prawoslaw toplumydyr. Žurnalistler şeýle hem Trabzona panorama görnüşi açylýan Boztepede (Boztepe) boldular.

Soňra žurnalistler topary Türkiýäniň çaý senagat merkezi bolan Rize şäherine ugradylar. Ramada Plaza Rize myhmanhanasyna ýerleşen žurnalistler beýik dag belentliginde ösdürilip ýetişdirilýän çaýyň ekin meýdanlaryna baryp gördüler. Olar meşhur Çaykur we Ziraat Çay Bahçesi merkezlerini, şeýle hem Çayeli obasynda ferma kemerlerini gördüler, ol ýerde meşhur Rize çaýynyň ösdürilişi, ýygnalyşy we işlenişi bilen tanyşdylar.

Ýol ugrunda žurnalistler topary tebigy kenepden dokalan matalaryň adaty önümçiligi bilen tanyşdy – bu dokma senagatynda ekologiýa taýdan amatly alternatiwa hökmünde häzirki wagtda dikeldilýän gadymy senet bolup durýar.

Agşamky maksatnama laýyklykda türkmen žurnalistleri şäheriň täze ýadygärligi - sebitiň çaý medeniýeti bilen buýsanjyny alamatlandyrýan «Uly çaý bulgury» (Büyük Çay Bardağı Heykeli) atly ýadygärligine gezelenç etdiler.

Saparyň şol güni bu sebitiň meşhur tagamlaryny dadyp görmek bilen tamamlandy, myhmanlara şol sanda mekgejöwen unundan, ýagdan we ýerli peýnirden taýýarlanýan goýy peýnir tagamly muhlama nahary we Gara deňiz kenaryndaky sebitiň aşhana nyşany bolan hamsi balygy hödür edildi. Žurnalistler diňe bir ýerli lezzetleri datmak bilen çäklenmän, eýsem olaryň taýýarlanmagyna-da gatnaşdylar.

Sebitiň tebigy we taryhy ýadygärlikler

Üçünji gün tebigy ýadygärliklerine we dag etraplaryndaky taryhy ýadygärliklere bagyşlandy. Žurnalistler Aýder (Ayder Yaylası) platosyna ugradylar, ýolda gaýalary kesip geçýän joşgunly Firtina (Fırtına Deresi) derýasynyň akabasy türkmen žurnalistlerinde ýatdan çykmajak täsirleri galdyrdy.

Seljuklar döwründen (XIII-XIV asyrlar) galan gadymy daş köprüler aýratyn gyzyklanma döretdi, olar häzirki günde hem ulanylýar we öz döwrüniň inženerçilik sungatynyň ajaýyp nusgasy hasaplanýar. Maksatnamanyň indiki nokady Zilkale (Zilkale) galasy boldy, ol çuň deräniň üstünde takmynan 750 metr belentlikdäki gaýada ýerleşýär. Seljuklar döwründe gurlan bu gala, Anatoliýa bilen Kawkazyň arasyndaky möhüm söwda ýolunda gorag nokady we garawul bekedi bolup hyzmat edipdir.

Žurnalistler şeýle hem Türkiýäniň Gara deňiz kenarynda iň köp suwly hasaplanýan we «Kaçkar» milli seýilgähinde ýerleşýän Palewit şaglawugyny gördüler.

Günüň ahyrky tapgyrynda türkmen žurnalistleri joşgunly Firtina derýasynda howa bilen doldurylýan gaýyklarda raftinge – ýagny, derýanyň akymy boýunça ýüzmeklige gatnaşdylar. Tälimçileriň we ähli zerur bolan serişdeler bilen üpjün edilen žurnalistler derýanyň öwrülmelerinden we gaýalaryndan geçip, tebigatyň güýjüni duýdular.

Wakalardan doly bolan günden soň, žurnalistler topary dagyň eteginde ýerleşýän Kaçkar Resort Hotel dag myhmanhanasyna ýerleşdiler.

Üç günüň dowamynda žurnalistler Türkiýäniň Gara deňiz sebitiniň medeni, taryhy we syýahatçylyk mümkinçilikleri barada baý materiallary topladylar. Syýahatyň netijesi boýunça Trabzon we Rize sebitleriniň tebigatynyň, medeniýetiniň we däpleriniň baýlygy barada gürrüň berýän habarlar materiallary taýýarlanar.