Girmek
Aşgabatda gurulmagy meýilleşdirilýän Çagalar we ýetginjekler merkeziniň çäginde Bazar Amanow adyndaky döwlet çagalar kitaphanasynyň täze binasyny gurmak göz öňünde tutulýar. TDH-niň habar berşi ýaly, bu barada türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Aşgabat şäheri boýunça amala aşyran iş saparynyň barşynda aýdyldy.
Wise-premýer B.Annamämmedow taslamalar baradaky hasabatynyň çäklerinde Aşgabatdaky Bazar Amanow adyndaky döwlet çagalar kitaphanasynyň binasynyň könelendigini, onuň ulanyş möhletiniň geçendigini nazara alyp, Türkmenistanyň Prezidentiniň tabşyrygyna laýyklykda, kitaphananyň täze binasyny gurmak boýunça şekil taslamalarynyň taýýarlanylandygyny aýtdy we olary Gahryman Arkadagyň garamagyna hödürledi.
Halk Maslahatynyň Başlygy taslamalar bilen içgin tanşyp, Bazar Amanowyň adyny göterýän döwlet çagalar kitaphanasynyň täze binasynyň «Güneşli» Çagalar we ýetginjekler merkeziniň çäginde gurulmagynyň maksadalaýyk boljakdygyny aýtdy.
Merkezde çagalaryň ukyp-başarnyklaryny açyp görkezmeklerinde möhüm ähmiýeti bolan birnäçe ugurlar boýunça gurnaklaryň hereket edýändigini nazara alanyňda, sanly tehnologiýalaryň we täzeçil usullaryň netijeli ulanylýan döwründe bu ýerde döwlet çagalar kitaphanasynyň gurulmagynyň ähmiýetli boljakdygyny aýdyp, türkmen halkynyň Milli Lideri onuň amala aşyrylmagyna ugurdaş düzümleriň wekilleri bilen bilelikde girişilmelidigine ünsi çekdi.