Şu gün Aşgabatdaky Olimpiýa şäherçesiniň Başa-baş söweş sungaty sport toplumynda milli we guşakly alyş göreşi boýunça halkara ýaryş badalga alýar. Şu mynasybetli Türkmenistanyň Prezidenti Serdar Berdimuhamedow bu halkara ýaryşa gatnaşyjylara Gutlag bilen ýüzlendi. "Türkmenistan" gazetinde çap edilen Gutlagynda döwlet Baştutany şeýle diýýär:

"Hormatly halkara ýaryşa gatnaşyjylar!

Gadyrly myhmanlar!

Sizi Halkara parahatçylyk we ynanyşmak ýylynda myhmansöýer türkmen topragynda geçirilýän sportuň milli we guşakly alyş göreşi boýunça halkara ýaryşyň açylmagy mynasybetli tüýs ýürekden gutlaýaryn. Eziz Diýarymyzyň sport taryhynda möhüm waka boljak bu ýaryşyň halkara sport hyzmatdaşlygyny pugtalandyrmaga, parahatçylygy, dostlugy dabaralandyrmaga, Olimpiýa hereketiniň ýörelgelerini wagyz etmäge hem-de ornaşdyrmaga, sportuň milli we guşakly alyş göreşi boýunça türgenleriň ussatlygyny we tejribelerini artdyrmaga uly goşant goşjakdygyna berk ynanýaryn.

Biz Garaşsyz, hemişelik Bitarap Türkmenistanda köpçülikleýin bedenterbiýe-sagaldyş hereketini ilerletmek bilen bir hatarda, ussat türgenleri, tälimçileri we bu ugra degişli hünärmenleri taýýarlamak arkaly ýokary netijeli sporty ösdürmäge aýratyn üns berýäris. Ata-babalarymyzyň asylly ýoluny dowam etdirip, sporty dünýä ýurtlary bilen hyzmatdaşlygyň möhüm ugry, halklaryň arasynda dostlukly gatnaşyklary pugtalandyrmagyň möhüm serişdesi hasap edýäris.

Hormatly ýaryşa gatnaşyjylar!

Berkarar döwletiň täze eýýamynyň Galkynyşy döwründe ýurdumyzyň ähli welaýatlarynda, paýtagtymyz Aşgabatda we Arkadag şäherinde köpugurly stadionlar, bedenterbiýe-sagaldyş toplumlary, sport mekdepleri we beýleki desgalar yzygiderli gurlup ulanmaga berilýär. Garaşsyz, hemişelik Bitarap ýurdumyz Birleşen Milletler Guramasynda möhüm başlangyçlar bilen çykyş edip, halkara sport hyzmatdaşlygyny has-da pugtalandyrmaga, Halkara Olimpiýa Komitetiniň, Aziýanyň Olimpiýa Geňeşiniň agzasy hökmünde Olimpiýa hereketini ösdürmäge mynasyp goşant goşýar. Ata Watanymyzda iri sport ýaryşlarynyň, şol sanda Aziýa oýunlarynyň, yklym birinjilikleriniň, dünýä çempionatlarynyň ýokary derejede guralmagy üçin ähli şertler hem-de mümkinçilikler döredilýär. Birleşen Milletler Guramasynyň Baş Assambleýasynyň 78-nji sessiýasynda Türkmenistanyň başlangyjy bilen «Birleşen Milletler Guramasynyň oýunlary» atly Kararnamanyň kabul edilmegi, GDA-nyň Hökümet Baştutanlarynyň Geňeşiniň mejlisinde Aşgabadyň «Arkalaşygyň täze sport mümkinçilikleriniň şäheri», Olimpiýa şäherçesiniň Tennis toplumynyň Aziýanyň Tennis federasiýasy tarapyndan «Tennis boýunça Aziýa sebitiniň okuw-türgenleşik merkezi» diýlip yglan edilmegi sport özgertmelerimiziň halkara derejede giňden goldanylýandygyny görkezýär.

Hormatly halkara ýaryşa gatnaşyjylar!

Beýik Ýüpek ýolunyň ýüregi bolan gadymy türkmen topragynda ýaşan ata-babalarymyz beden we ruhy taýdan sagdyn nesli terbiýelemekde göreşe aýratyn uly ähmiýet beripdirler, pälwanlary ýetişdirmegiň özboluşly milli mekdebini döredipdirler. Pederlerimizden miras galan türkmen milli göreşini çyn ýürekden söýen halkymyz ony asyrlarboýy kämilleşdiripdir, göreşiň sport görnüşi hökmünde ösmegine uly goşant goşupdyr. Häzirki döwürde hem göreş sungatymyz milli gymmatlyk hökmünde yzygiderli ösdürilýär. Türkmen milli göreşi bilen bir hatarda, göreşiň beýleki görnüşlerine, şol sanda guşakly alyş göreşine hem uly üns berilýär. Türgenlerimiz milli we guşakly alyş göreşi boýunça halkara ýaryşlarda üstünlikli çykyş edýärler.

Hormatly halkara ýaryşa gatnaşyjylar!

Gadyrly myhmanlar!

Aşgabadyň «Arkalaşygyň täze sport mümkinçilikleriniň şäheri» diýlip yglan edilmegi mynasybetli, paýtagtymyzyň Olimpiýa şäherçesiniň Başa-baş söweş sungaty sport toplumynda milli we guşakly alyş göreşi boýunça halkara ýaryşyň geçirilýän günlerinde daşary ýurtly myhmanlarymyzyň türkmen halkynyň myhmansöýerligi bilen ýakyndan tanyşjakdyklaryna we olaryň kalbynda güneşli ýurdumyz hakynda ýakymly duýgularyň saklanyp galjakdygyna berk ynanýaryn. Sizi milli we guşakly alyş göreşi boýunça halkara ýaryşyň açylmagy bilen ýene-de bir gezek tüýs ýürekden gutlaýaryn. Size berk jan saglyk, rowaçlyk, sportda we durmuşda uly üstünlikleri arzuw edýärin. Goý, bu ajaýyp sport baýramçylygy dostlugy, sagdynlygy we ruhubelentligi dünýä ýaýsyn!".