17-nji fewralda Seulda iki taraplaýyn hyzmatdaşlygyň geljegini ara alyp maslahatlaşmak maksady bilen Türkmenistanyň Koreýa Respublikasyndaky Adatdan daşary we Doly ygtyýarly ilçisi B.Durdyýewiň Ählumumy ýaşyl ösüş institutynyň (GGGI) Assambleýasynyň Prezidenti we Geňeşiniň Başlygy, BMG-niň sekizinji Baş sekretary Pan Gi Mun bilen duşuşygy geçirildi. Bu barada Türkmenistanyň ilçihanasynyň sosial ulgamdaky sahypasynda habar berilýär.

Duşuşykda Pan Gi Mun Türkmenistany Hemişelik Bitaraplygynyň 30 ýyllygy we BMG-niň Baş Assambleýasy tarapyndan 2025-nji ýylyň «Halkara parahatçylyk we ynanyşmak ýyly» diýlip yglan edilmegi bilen gutlady. Ol soňky otuz ýylyň dowamynda Türkmenistanyň bitaraplyk syýasatyna yzygiderli ygrarlydygyna, sebit parahatçylygyna we ösüşine işjeň goldaw berýändigine, şeýle hem ynsanperwer daşary syýasata ygrarlydygyna ýokary baha berip, olar görelde alarlykdyr – diýip, aýtdy.

Türkmenistan bilen köpýyllyk gatnaşyklary ýatlamak bilen, Pan Gi Mun BMG-niň Baş sekretary wezipesinde işlän döwründe 2010, 2015 we 2016-njy ýyllarda Aşgabada eden saparlaryny, şeýle hem döwlet Baştutany bilen duşuşyklaryny ýatlaýandygyny aýtdy. Şunuň bilen baglylykda, ol Türkmenistanyň ýolbaşçylaryna iň gowy arzuwlaryny ýetirmegi haýyş edip, olaryň dünýä boýunça parahatçylygyň we durnuklylygyň saklanmagyna yzygiderli goşandyna ýokary baha berdi.

Ilçi B.Durdyýew Türkmenistanyň Bitaraplygynyň 30 ýyllygy we 2025-nji ýyldaky Halkara parahatçylyk we ynanyşmak ýyly mynasybetli ýurduň içinde hem-de halkara derejesinde meýilleşdirilen esasy çäreler barada gysgaça syn berdi. Hususan-da, ol şu ýylyň 11-12-nji dekabrynda meýilleşdirilen Halkara forumyny, şeýle hem Türkmenistanyň bu ýyl üçin iş Konsepsiýasynyň we ileri tutulýan ugurlarynyň çäklerinde meýilleşdirilen çärelerini belläp geçdi.

Pan Gi Mun berlen maglumatlar üçin hoşallygyny bildirdi we 2025-nji ýylda Türkmenistanyň başlangyçlaryna we çärelerine zerur bolan ýagdaýynda goldaw bermäge we goşant goşmaga taýýardygyny tassyklady.

Duşuşykda taraplar şeýle hem ýaşyl ösüş, innowasion tehnologiýalary ornaşdyrmak we tokaý massiwlerini durnukly dolandyrmak mehanizmlerini pugtalandyrmak babatda bilelikdäki tagallalar arkaly tejribe alyşmak ýoly bilen hyzmatdaşlygy giňeltmek meselelerinde pikir alyşdylar.