Änew şäheriniň «Ahal» futbol kluby 2025-nji ýylyň baharynda çagalar futbol akademiýasyny açmagy meýilleşdirýär. Klubyň täze taslamalarynyň çäklerinde zenanlar komandasy we erkekler futzal komandasyny döretmek hem göz öňünde tutulýar. Bu barada klubyň metbugat gullugy «Türkmenportal» internet neşirine habar berdi.

Bu taslamalaryň maksady ýurtda ýaşlar we zenanlar futbolyny, şeýle hem futzaly ösdürmek bolup durýar. Taslama täze zehinleri futbola çekmäge we ýaş türgenlere ösüş hem-de hünär taýdan kämilleşmek üçin mümkinçilikleri döretmäge gönükdirilendir.

Şeýle başlangyçlaryň mysallary dünýäniň ähli ýerindäki halkara klublary tarapyndan goldanylýar we FIFA hem-de AFC guramalary tarapyndan goldaw berilýär we ykrar edilýär. Bu taslamalar Türkmenistanyň Futbol federasiýasy tarapyndan hem işjeň goldanylýar. TFF-niň başlygy ýaş zehinleri goldamak we ösüp gelýän nesil üçin futbol infrastrukturasyny pugtalandyrmak boýunça ýörite maksatnamalary durmuşa geçirip, ýurdumyzda çagalar-ýetginjekler futbolynyň ösmegine aýratyn üns berýär.

«Ahal» — Ahal welaýatynyň Änew şäheriniň ussatlyk derejesine ýeten futbol klubydyr. Ol 1989-njy ýylda esaslandyryldy. Ol «Türkmennebitönümleri» Baş müdirliginiň komandasydyr. 2024-nji ýylyň möwsüminde «Ahal» Türkmenistanyň Ýokary ligasynda kümüş medaly gazandy we ýurduň Kubogy ugrundaky ýaryşda finala çenli ýetip, «Arkadag» toparyndan (0:1) ýeňildi.