Habar berşimiz ýaly, Prezident Serdar Berdimuhamedow welaýatlaryň we Aşgabat şäheriniň häkimleriniň hem gatnaşmagynda Ministrler Kabinetiniň we Döwlet howpsuzlyk geňeşiniň giňişleýin mejlisini geçirdi.

Mejlisiň dowamynda Prezident Serdar Berdimuhamedow oňa gatnaşyjylara ýüzlenip, «Pähim-paýhas ummany Magtymguly Pyragy ýylynda» ýurtda taryhy özgertmeleriň durmuşa geçirilendigini, türkmen halkynyň abadan we bagtyýar durmuşynyň has-da rowaçlanandygyny, türkmeniň beýik ogly Magtymguly Pyragynyň 300 ýyllyk toýunyň halkara derejede giňden toýlanandygyny kanagatlanma bilen belledi we şu ýylyň jemlenmegi bilen bagly «Magtymguly — dünýäniň akyldary» atly kitabyny ýazyp tamamlandygyny aýtdy.

Döwlet Baştutany öz eserinde beýik söz ussadynyň edebi mirasynyň, dünýä medeniýetine goşan ägirt uly goşandynyň, şahyryň ýubileý toýy bilen bagly geçirilen çäreleriň giňden beýan edilýändigini, şeýle hem ýurtda ýetilen sepgitleriň, gazanan üstünlikleriň jeminiň jemlenýändigini belledi we bu kitabyň mähriban türkmen halkyna mynasyp sowgat boljakdygyny aýtdy.

"Watan" habarlar gepleşiginde habar berlişi ýaly, mejlisiň barşynda wise-premýer, daşary işler ministri R.Meredow çykyş edip, mejlise gatnaşyjylaryň adyndan Prezident Serdar Berdimuhamedowy täze kitabynyň çapdan çykmagy bilen tüýs ýürekden gutlady hem-de berk jan saglyk, uzak ömür, mundan beýläk-de döredijilik üstünliklerini arzuw etdi.