Girmek
Lebap welaýatynyň Türkmenabat şäherindäki «Türkmeniň ak öýi» binasynda Türkmenistanyň we Özbegistan Respublikasynyň II sebitara forumynyň we özbek harytlarynyň milli sergisiniň açylyş dabarasy boldy.
«Watan» habarlar gepleşiginde habar berlişi ýaly, bu dabara Türkmenistanyň ministrlikleriniň we pudaklaýyn dolandyryş edaralarynyň, welaýatlaryň häkimlikleriniň, jemgyýetçilik guramalarynyň, köpçülikleýin habar beriş serişdeleriniň ýolbaşçylary hem-de wekilleri, şeýle hem Özbegistanyň wekiliýetiniň agzalary gatnaşdylar. Aýdym-saz toparlarynyň çykyşlary dabara özboluşly baýramçylyk öwüşginini çaýdy.
Foruma gatnaşyjylar Özbegistanda öndürilýän harytlaryň sergisi bilen hem tanyşdylar. Sergide goňşy ýurduň iri döwlet düzümleriniň we hususy kompaniýalarynyň öndürýän önümleri we hyzmatlary bilen tanyşdyryldy. Köpugurly serginiň meýdançalarynda dag-magdan, metallurgiýa we nebitgaz senagatynda, maşyn gurluşygynda, elektrik energetikasynda, dokma we himiýa senagatynda, gurluşyk serişdeleri, durmuş tehnikasy we azyk önümleri, lukmançylyk serişdeleri, söwda ulgamlarynda iş alyp barýan kompaniýalar öz diwarlyklaryny guradylar.