Girmek
Türkmen kompaniýalary 2024-nji ýylyň noýabr aýynyň ahyrynda Pekinde geçiriljek «China International Supply Chain Expo» («CISCE») ikinji halkara sergisine gatnaşmaga çagyrylýar. Üpjünçilik zynjyrlary boýunça ýöriteleşdirilen dünýädäki ilkinji milli sergi bolan bu çäre 26 — 30-njy noýabr aralygynda Pekindäki Halkara Sergiler Merkezinde geçiriler. Bu barada TSTB-niň resmi saýtynda habar berildi.
Serginiň dowamynda umumy meýdany 100 000 inedördül metrden gowrak bolan pawilýonlarda üpjünçilik zynjyrynyň 50-ä golaý ugurlary we esasy bölekleri görkeziler. Çäräniň dowamynda esasy üns «Bir guşak — bir ýol» başlangyjynyň çäklerindäki hyzmatlara gönükdiriler.
Bu abraýly halkara sergi «akylly» ulag, öňdebaryjy önümçilik, «ýaşyl» oba hojalygy, arassa energetika, sanly tehnologiýalar hem-de sagdyn durmuş ýörelgesi ýaly ugurlary öz içine alýar.
Sergi «Umumy geljek üçin dünýäni birleşdirmek» şygary astynda geçiriler.
Ýeri gelende bellesek, 2023-nji ýylda geçirilen birinji «CISCE» sergisine 55 ýurtdan 515 kompaniýa gatnaşypdy.
Guramaçylar gatnaşyjylara üpjünçilik zynjyrlary çygrynda halkara hyzmatdaşlygyny, maýa goýumlaryny we tejribe alyşmagy ösdürmäge gönükdirilen mümkinçilikleri açmak üçin şahsy gezelençleri we VIP-hyzmatlary hödürleýärler.