Girmek
Beki Seýtäkow adyndaky Mugallymçylyk mekdebiniň mugallymlary we talyp ýaşlarynyň gatnaşmagynda «Pederleriň ýörelgesi — nesillere görelde» atly maslahat geçirildi. Mekdebiň mugallymlary Miwe Agyşowanyň, Bibisere Saparowanyň milli bilim ulgamynyň taryhy ösüşine mynasyp goşant goşan şahsyýetleriň durmuş we zähmet ýoly bilen baglanyşykly çykyşlary talyplarda uly täsir galdyrdy.
Mugallym, esger, ilhalar ynsan Berdimuhamet Annaýewiň durmuş we zähmet ýoly tutuş türkmen halky, aýratyn-da, ýaşlar üçin görelde mekdebine öwrüldi. Maslahatda peder ýoluny dowam etdirip, ýaş nesle bilim-terbiýe berip, öz ukyp-başarnygy bilen bilim ulgamynda öçmejek yz goýan Mälikguly aganyň öwüt-ündewleri ähli bilim işgärleri bilen birlikde, Beki Seýtäkow adyndaky Mugallymçylyk mekdebiniň mugallymlary we talyp ýaşlary üçin hem nusgalyk ýol-ýörelgedir diýlip bellenildi.
Döredijilik gurnaklaryna gatnaşýan talyplaryň ýerine ýetiren alkyşnamasy, sahna oýny maslahatyň döredijilik şowhunyny has hem artdyrdy. Maslahatyň ahyrynda Artykgül Meläýewanyň ýerine ýetiren aýdymy oňa gatnaşyjylarda uly täsir galdyrdy.