Türkiýäniň milli ýygyndysy futbol boýunça Ýewropa çempionatynyň 1/8 finalynda Awstriýany ýeňlişe sezewar etdi. Germaniýanyň Leýpsig şäherinde geçirilen oýun 2:1 hasabynda Türkiýäniň peýdasyna tamamlandy.

Türkiýäniň düzüminde iki gola hem Merih Demiral awtorlyk etdi. Ol duşuşygyň 1-nji we 59-njy minutlarynda tapawutlandy. Ýeri gelende bellesek, Demiralyň birinji goly 57-nji sekuntda derwezä geçirilip, ol Ýewropa çempionatlarynyň pleý-off tapgyryndaky iň çalt urlan gol boldy. Awstriýanyň jogap goluny Mihael Gregoriç derwezä gönükdirdi.

1/8 final tapgyrynyň beýleki oýnunda Niderlandlar 3:0 hasabynda Rumyniýadan üstün çykdy. Niderlandlaryň gollary Kodi Gakponyň (20) hem-de Doniell Maleniň (83, 90+3) adyna ýazyldy.

Türkiýe çärýek finalda 6-njy iýul güni Niderlandlar bilen duşuşar. Oýun Aşgabat wagty bilen sagat 23:45-de başlanar.