1-nji martda sanly ulgam arkaly geçiren Hökümet mejlisinde Türkmenistanyň Prezidenti Serdar Berdimuhamedow: «Sebitara we içerki awtomobil ýollaryny gurmak, bar bolanlarynyň durkuny täzelemek işlerini güýçlendirmek möhümdir» diýip nygtady we wise-premýer B.Annamämmedowa degişli tabşyryklary berdi. Bu barada TDH ýazýar.

Döwlet Baştutany şeýle-de şu ýyl ýurtda birnäçe iri önümçilik we durmuş maksatly binalarydyr desgalary ulanmaga bermegiň göz öňünde tutulýandygyny belledi. Şunuň bilen baglylykda, bu binalaryň gurluşygynyň bellenen möhletlerde ýokary hilli tamamlanmagy üçin gurluşyk we senagat toplumynyň kärhanalarynyň netijeli işlemegini gazanmagyň zerurdygy, şeýle hem himiýa kärhanalarynyň doly kuwwatynda işlemegi üçin degişli işleri alyp barmagyň wajypdygy, energetika pudagynyň kuwwatyny, elektrik energiýasynyň eksport edilýän möçberini artdyrmagyň hem möhümdigi barada aýdyldy.

Mejlisiň barşynda wise-premýer B.Annamämmedowyň gurluşyk we senagat toplumy tarapyndan 2024-nji ýylyň ýanwar-fewral aýlarynda ýerine ýetirilen işleriň netijeleri baradaky hasabatynda aýdylyşy ýaly, garalýan döwürde toplum tarapyndan öndürilmeli önümleriň we ýerine ýetirilmeli işleriň meýilnamasy 117,2 göterim, Gurluşyk we binagärlik ministrligi boýunça 107,3 göterim berjaý edildi. Şu ýylyň geçen iki aýynda Senagat we gurluşyk önümçiligi ministrligi boýunça öndürilmeli önümleriň we ýerine ýetirilmeli işleriň meýilnamasynyň berjaý edilişi 100 göterime, Energetika ministrligi tarapyndan önüm öndürmegiň we ýerine ýetirilmeli işleriň meýilnamasynyň berjaý edilişi bolsa 112,4 göterime deň boldy. Ýylyň başyndan bäri “Türkmenhimiýa” döwlet konserni tarapyndan önüm öndürmegiň we ýerine ýetirilmeli işleriň meýilnamasy 143,7 göterim, Awtomobil ýollarynyň gurluşygyny dolandyrmak baradaky döwlet agentligi boýunça ýerine ýetirilmeli işleriň meýilnamasy 109,8 göterim, Aşgabat şäheriniň häkimligi boýunça meýilnama 109,7 göterim berjaý edildi.