Türkmen türgenleri erkin göreş boýunça halkara ýaryşa – Krasnoýarskide indi 35-nji gezek geçirilýän Iwan Ýaryginiň Kubogy ugrunda ýaryşa gatnaşarlar.

Heniz başlanmanka bu abraýly ýaryş rekord goýdy. Iwan Ýaryginiň Kubogy ugrunda ýaryşyň guramaçylarynyň habar bermegine görä, şu ýyl oňa 24 ýurtdan pälwanlar gatnaşýarlar.

Türkmen sportçularyndan başga-da, Azerbaýjan, Albaniýa, Argentina, Ermenistan, Belarus, Wenesuela, Jorjiýa, Eýran, Hindistan, Gazagystan, Hytaý, Kuba, Gyrgyzystan Respublikasy, Moldowa, Mongoliýa, Russiýa, Rumyniýa, Siriýa, Täjigistan, Türkiýe, Özbegistan, Koreýa Respublikasy, Ekwador ýaly ýurtlaryň wekilleri ýaryşa gatnaşýarlar. Argentinadan, Wenesueladan, Siriýadan we Ekwadordan gelen pälwanlaryň Sibirde geçirilýän ýaryşa ilkinji gezek gatnaşýandygyny bellemek gerek.

Iwan Ýaryginiň Kubogy ýaryşyna gatnaşýanlar erkekleriň we zenanlaryň arasynda 20 baýrak toplumy ugrunda bäsleşerler.

2024-nji ýylda Parižde geçiriljek Olimpiýa oýunlaryna entek ygtyýarnama almadyk türkmen erkin göreş pälwanlary üçin bu ýaryş saýlama ýaryşlara ýeterlik taýýarlyk görmekde amatly mümkinçilikdir.

Türkmenistan milli ýygyndysynyň düzüminde Alp Arslan Begenjow (agramy 71 kg çenli), Döwletmyrat Orazgylyjow (86 kg çenli) we Zyýamuhammet Saparow (125 kg çenli) dagy Iwan Ýaryginiň Kubogy ugrunda bäsleşerler. Olar ozal Dagystanda on günlük türgenleşik ýygnanşygyny geçirdiler.

Iwan Ýarygin (1948–1997) – erkin göreş boýunça Ýewropanyň üç gezek çempiony, dünýä çempiony, Olimpiýa oýunlarynyň iki gezek çempiony. Iwan Ýarygin adyndaky ýaryş 1990-njy ýylda döredildi. Ilkinji ýaryş Abakanda geçirildi. 1991-nji ýyldan bäri ýaryş Krasnoýarskide geçirilýär.