Türkmenistanyň Daşary işler ministrliginde ministriň orunbasary Ahmet Gurbanow bilen Täjigistanyň ilçisi Wafo Niýatbekzodanyň arasynda duşuşyk geçirildi. Bu barada Daşary işler ministrliginiň metbugat gullugy tarapyndan habar berildi.

Duşuşykda syýasy, söwda, ykdysady we ynsanperwer ugurlarda ikitaraplaýyn hyzmatdaşlygy ösdürmegiň geljegi ara alnyp maslahatlaşyldy.

Taraplar Türkmenistanyň Prezidenti Serdar Berdimuhamedowyň maý aýynda Täjigistana amala aşyran saparynyň netijelerine oňyn baha berdiler hem-de bu saparyň iki ýurduň arasyndaky gatnaşyklary has-da pugtalandyrjakdygyny tassykladylar.

Gepleşikleriň barşynda söwda-ykdysady gatnaşyklara aýratyn üns berildi. Iki taraplaýyn söwda dolanyşygyny ýokarlandyrmagyň zerurlygy bellendi. 2023-nji ýylyň noýabr aýynda Duşenbe şäherinde geçirilen Söwda-ykdysady, ylmy-tehniki hyzmatdaşlyk boýunça bilelikdäki türkmen-täjik hökümetara toparynyň mejlisiniň kararlarynyň durmuşa geçirilişiniň depginine syn berildi.

Diplomatlar ynsanperwer ugurda ýakyn gatnaşyklary dowam etdirmegiň möhümdigini aýtdylar. Şu nukdaýnazardan, Aşgabatda we Duşenbe şäherinde Türkmenistanyň hem-de Täjigistanyň Medeniýet günlerini yzygiderli geçirmegiň zerurdygy bellendi.

Duşuşykda iki ýurduň parlamentleriniň arasyndaky mundan beýläkki gatnaşyklar we parlamentarileriň saparlaryny alyşmagyň geljegi hem ara alnyp maslahatlaşyldy.