Şu gün Türkmenistanyň daşary işler ministri Raşid Meredow bilen Türkiýe Respublikasynyň Türkmenistandaky täze bellenen Adatdan daşary we Doly ygtyýarly ilçisi Ahmet Demirokyň arasynda duşuşyk geçirildi. Bu barada ministrligiň resmi saýtynda habar berildi.

R.Meredow ilçini jogapkärli wezipä bellenmegi bilen gutlady we diplomatik işinde üstünlikleri arzuw etdi.

Habarda bellenilişi ýaly, duşuşykda taraplar syýasy-diplomatik, söwda-ykdysady, medeni-ynsanperwer ugurlarda ikitaraplaýyn hyzmatdaşlygyň köp sanly meselelerini ara alyp maslahatlaşdylar. Parlamentara hyzmatdaşlygyň, şeýle hem BMG, Yslam Hyzmatdaşlyk Guramasy we beýlekiler ýaly halkara guramalaryň çäklerinde özara gatnaşyklaryň mundan beýläk-de ösdürilmegine özara gyzyklanmalary beýan edildi.

Şonuň ýaly-da, iň ýokary we ýokary derejelerde saparlary we gepleşikleri guramagy dowam etdirmegiň zerurlygyna aýratyn üns berildi. Şu nukdaýnazardan, Türkmenistanyň Prezidenti Serdar Berdimuhamedowyň 2023-nji ýylyň 25-26-njy oktýabrynda Türkiýe Respublikasyna resmi saparynyň dowamynda gazanylan ylalaşyklaryň iş ýüzünde durmuşa geçirilmeginiň ähmiýeti barada aýdyldy.

Ilçi Ahmet Demirok Türkmenistanyň daşary işler ministrine ynanç hatlarynyň nusgalaryny gowşurdy we Türkmenistandaky diplomatik işiniň dowamynda türkmen-türk gatnaşyklaryny mundan beýläk-de ösdürmek üçin ähli tagallalary etjekdigini nygtady.