Türkmenistanda

1. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenko bilen telefon arkaly söhbetdeşlik geçirdi. Söhbetdeşler 2023-nji ýylda türkmen-rus gatnaşyklarynyň ösüşine ýokary baha berdiler. Syýasy, söwda-ykdysady we ynsanperwer ulgamlarda hyzmatdaşlygyň işjeňleşýändigi bellenildi. Taraplar söwda-ykdysady hyzmatdaşlygy we durmuş-medeni ulgamda özara gatnaşyklary hyzmatdaşlygyň ileri tutulýan ugurlarynyň hatarynda kesgitlediler.

2. Türkmenistanyň Prezidenti Serdar Berdimuhamedow degişli Karara gol çekip, ministrlikler we pudaklaýyn dolandyryş edaralary tarapyndan 2024-nji ýylda geçiriljek sergileriň, ýarmarkalaryň, maslahatlaryň, festiwallaryň sanawyny hem-de olary geçirmek boýunça guramaçylyk toparynyň düzümini tassyklady. Resminama laýyklykda, ministrliklere we pudaklaýyn dolandyryş edaralaryna degişli çäreleriň ýokary derejede, guramaçylykly geçirilmegini üpjün etmek tabşyryldy.

3. Täze ýyl baýramçylygynyň öňüsyrasynda ýaş türkmen figuralaýyn typyjylary Aşgabadyň ýaşaýjylaryny we myhmanlaryny ajaýyp çykyşlary bilen begendirdiler. 6 ýaşdan 17 ýaşa çenli figuralaýyn typyjylaryň tutuş topary Gyşky oýunlar sport toplumynyň buzly sahnasyna çykdylar. Aýaz Baba we Garpamyk baýramçylygyň esasy sebäpkärleri boldular. Jadyly taýajygyň kömegi bilen buzda ertekileriň gahrymanlary peýda boldy. Figuralaýyn typyjylar milli türkmen aýdym-sazlarynyň we dünýäniň nusgawy sazlarynyň hazynasyndan eserleriň astynda öz çykyşlaryny ýerine ýetirdiler. Dünýäniň dürli dillerinde Täze ýyl aýdymlary ýaňlandy.

4. Ahal welaýatynyň Gökdepe etrabynda, şeýle-de, Balkanabat, Daşoguz, Türkmenabat we Mary şäherlerinde täze awtotürgenleşik meýdançalary gurlar. Täze desgalaryň gurluşygy bilen bir hatarda, awtotürgenleşik meýdançalaryny enjamlaşdyrmak üçin zerur bolan ulag serişdelerini, okuw enjamlaryny we materiallary satyn almaklyk hem meýilleşdirýär. Bu barada «Türkmenawtoulaglary» agentligi habar berýär.

5. Türkmenistanyň maliýe we ykdysadyýet ministri Serdar Joraýewiň ýolbaşçylygyndaky türkmen wekiliýeti Brýusselde geçirilen Türkmenistan — Ýewropa Bileleşigi bilelikdäki komitetiniň 22-nji mejlisiniň çäklerinde ýurduň ÝB bilen hyzmatdaşlygyna degişli meseleler boýunça gepleşikleri geçirdi. Bütindünýä Söwda Guramasyna goşulmak ugrundaky tagallalarynyň çäklerinde Türkmenistanda makroykdysady ýagdaýy gepleşikleriň esasy mowzuklarynyň biri boldy. Mundan başga-da, tebigy gazyň eksporty, Aşgabadyň atmosfera bölünip çykarylýan metanyň zyňyndylaryny azaltmak baradaky başlangyçlary, şeýle hem gaýtadan dikeldilýän energiýa çeşmeleriniň ösüşi ara alnyp maslahatlaşyldy.

Dünýäde

6. Gyrgyzystanyň Parlamenti ýurduň döwlet baýdagyndaky Gün şöhleleriniň şekilini üýtgetmek baradaky kanunyň taslamasyny goldady. Täze kanuna laýyklykda, tolkun şekilli şöhleler göni şöhleler bilen çalşyrylar. Taslamany öňe sürenler köp adamyň tolkun şekilli şöhleleri ýurtda esasy oba hojalyk ekini bolmadyk günebakar bilen baglanyşdyrýandygyny düşündirdiler. Şol bir wagtyň özünde, deputatlaryň pikiriçe, göni şöhleler Gün şöhlelerine has meňzeşdir.

7. Hytaýyň kagyz öndürýän «Dongpo Paper» kompaniýasy adaty ýyllyk bonusy işgärleriň geçýän aralyklaryna görä, aýlyk zähmet pul sylagy (premiýa) bilen çalyşmak kararyna geldi. Täze bonus ulgamyna laýyklykda, aýda 50 kilometr ýol geçýän işgärler doly pul sylagyny alýarlar. 40 kilometr üçin 60%, 30 kilometre – 30%, 100 kilometre bolsa 130% pul sylagy berilýär. Geçilýän ýol bölekleýin daga çykmak ýa-da sport ýörişi bilen çalşyrylyp bilner. Netijeler işgärleriň smartfonlarynda oturdylan ykjam programmalar arkaly bellige alnar.

Sport habarlary

8. Aşgabatda futzal boýunça Türkmenistanyň kubogynyň finaly geçirildi. «Köpetdag» we «Gara altyn» toparlary baş baýrak ugrunda göreşdiler. Oýun Türkmen döwlet bedenterbiýe we sport institutynyň sport toplumynda geçirildi we «Gara altynyň» peýdasyna 3:0 hasabynda tamamlandy.

9. Anna güni Moskwada meşhur «Pravda Boxing» boks promouşeniniň nobatdaky ýaryşy geçiriler. Bäsleşik «Lužniki» stadionyndaky Halkara boks merkezinde geçiriler. Bäsleşige gatnaşyjylaryň arasynda dürli ýurtlardan meşhur boksçylar bar. Orta agram derejesinde Türkmenistanyň wekili Ýunus Gurbanow bilen russiýaly Sergeý Seliwerstowyň arasynda gyzykly duşuşygyň geçirilmegine garaşylýar. Gurbanow üçin bu «Pravda Boxing» ýaryşlaryndaky ikinji söweş bolar. Ilkinji duşuşygynda ol Dmitriý Andreýewi ýeňipdi.