Türkmenistanda

1. Türkmenistanyň, Özbegistanyň, Eýranyň we Türkiýäniň ulag boýunça guramalarynyň wekilleri Özbegistan – Türkmenistan – Eýran – Türkiýe ugry boýunça Aziýa bilen Ýewropanyň arasynda halkara multimodal geçelgäni döretmek baradaky köptaraplaýyn duşuşygyň Teswirnamasyna gol çekdiler. Bu resminama Ykdysady Hyzmatdaşlyk Guramasynyň ulag ministrleriniň 12-nji mejlisiniň çäklerinde gol çekildi.

2. Türki Döwletleriň Guramasynyň «Ýedi gözel» taslamasyny durmuşa geçirmegiň çäklerinde Sýurihde konsert geçirildi, onuň maksatnamasy Azerbaýjanyň, Özbegistanyň, Gazagystanyň, Gyrgyzystanyň, Türkiýäniň, Türkmenistanyň we Wengriýanyň kompozitorlarynyň eserlerini bir ýere jemledi. Bu aýdym-saz çäresinde Türkmenistanyň at gazanan sungat işgäri, kompozitor Suhan Tüýliýewiň «Uzuklar» simfoniki toplumyndan söýgi we sazyň şypa beriji güýji hakynda söz açýan «Näzigiň aýdymy» atly eser Türkmenistana wekilçilik etdi.

3. Türkmenistanyň we Eýranyň gümrük edaralarynyň wekilleri iki ýurduň serhedinde ýerleşýän «Sarahs – Sarahs» gözegçilik-geçiriş nokadynda iş duşuşyklaryny geçirdileri. Duşuşyklaryň dowamynda hyzmatdaşlygy pugtalandyrmagyň meseleleri barada pikir alşyldy diýip, Türkmenistanyň Döwlet gümrük gullugynyň saýtynda habar berilýär. Taraplar gözegçilik-geçiriş nokadynda gije-gündiziň dowamynda harytlary gümrük taýdan resmileşdirmegiň, deslapky maglumat alyşmagyň meselelerini ara alyp maslahatlaşdylar.

4. Türkmenistanyň Döwlet medeniýet merkeziniň Döwlet muzeýiniň gaznasynda XIX asyryň ahyrlaryna we XX asyryň başlaryna degişli bolan özbek şaý-sepleriniň ýygyndysy saklanýar. Taýýarlanyş usuly taýdan özbek şaý-sepleri Merkezi Aziýanyň iri senetçilik merkezi bolan Horezmde öndürilipdir diýlip kesgitlendi. Bu ýygyndy 1928-nji ýylyň 20-nji sentýabrynda Türkmenistanyň muzeýiniň gaznasyna girizildi. Eksponatlaryň hemmesi kümüşden ýasalyp, az mukdarda altyn hem ulanylypdyr.

Dünýäde

5. Gazagystanyň Prezidenti Kasym-Žomart Tokaýew gazagystanly aýdymçy Dimaş Kudabergenowa gazak milli tohum iti bolan tazynyň güjügini sowgat berdi. Dimaş Gazagystanda tazy tohumyny gorap saklamaga hem-de onuň halkara derejede ykrar edilmegine uly üns berilýändigi üçin şatdygyny beýan etdi. Ol gazak tohumynyň tebigy gözelligi, agraslygy bilen tapawutlanýandygyny, öz pikirine görä, bu itleriň örän akyllydygyny belledi. Tazy sözi pars dilinden gelip çykyp, «tiz, çakgan», «çalasyn» diýmegi aňladýar.

6. Ilon Mask ChatGPT we beýleki generatiw emeli intellekt ulgamlary bilen bäsdeş hökmünde döredilen «Grok» atly täze neýro ulgamy işe girizdi. «Grok-yň» tapawutly aýratynlygy onuň «X» sosial ulgamynyň mazmuny (kontenti) boýunça tälim almagydyr, şeýlelikde, onuň maglumatlar binýady hakyky wagt birliginde täzelenip durýar. «Grok» neýro ulgamynyň dil modeli ýaňsylamaga gönükdirilendir we ol ýiti teswirleri ýazmagy halaýar.

Sport habarlary

7. «Ahal» AFK Çempionlar ligasynyň 4-nji tapgyrynyň çäklerindäki duşuşykda «Pahtakory» kabul etdi. Duşuşyk 1:1 hasabynda deňme-deň tamamlandy. Ýer eýeleriniň düzüminde Alibek Abdyrahmanow pökgini tora girizdi, «Pahtakordan» bolsa Hožimat Erkinow tapawutlanmagy başardy. Duşuşygyň 64-nji minudynda malaýziýaly emin Nazmi Nasaruddin VAR ulgamy arkaly hereketleri göreninden soň, «Pahtakoryň» ýarymgoragçysy Odil Hamrobekowa gyzyl duýduryş görkezdi.

8. 8-nji noýabrda AFK Kubogynyň toparçalaýyn tapgyrynyň 4-nji aýlawynyň çäginde Aşgabadyň «Altyn asyry» bilen Mary şäheriniň «Merw» toparynyň arasyndaky duşuşyk geçiriler. Duşuşyk Aşgabatda geçiriler we ýerli wagt bilen sagat 19:00-da başlar. Duşuşyk üçin petekleri «Aşgabat» stadionynyň kassasynda, şeýle hem «Berkarar», «Gülzemin» söwda-dynç alyş merkezlerinde we «Garaşsyzlygyň 15 ýyllygy» söwda merkezinde satyn alyp bilersiňiz. Bir petegiň bahasy 30 manat.

9. Angliýanyň «Mançester Siti» topary Ýewropanyň Çempionlar ligasynyň toparçalaýyn tapgyrynyň 4-nji aýlawynda Şweýsariýanyň «Ýang Boýz» toparyny 3:0 hasabynda ýeňdi. «G» toparçadaky beýleki duşuşykda «Leýpsig» myhmançylykda «Srwena Zwezdany» 2-1 hasabynda ýeňdi. Çempionlar ligasynyň 1/8 finalyna ilkinji bolup iňlis we nemes toparlarynyň çykmaga hukuk gazanandyklaryny bellemek gerek.