Şu gün Aşgabatda «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi öz işine başlady. Türkmenistanyň Söwda-senagat edarasynyň binasynda guralan sergi üç günläp dowam eder. Onda ýurduň saglygy goraýyş, bilim we sport ulgamlarynda Garaşsyzlyk ýyllarynda ýetilen sepgitler, bu ugurlarda Berkarar döwletiň täze eýýamynyň Galkynyşy döwründe gazanylan üstünlikler görkezilýär.

Her ýylyň 10-njy oktýabrynda ýurtda giňden bellenilýän Türkmenistanyň saglygy goraýyş we derman senagaty işgärleriniň baýramyna bagyşlanan bu halkara sergi Saglygy goraýyş we derman senagaty, Bilim ministrlikleriniň hem-de Bedenterbiýe we sport baradaky döwlet komitetiniň Türkmenistanyň Söwda-senagat edarasy bilen bilelikde guramagynda geçirilýär.

Halkara serginiň açylyş dabarasyna Hökümet agzalary, Türkmenistanyň Halk Maslahatynyň agzalary, Mejlisiň deputatlary, ministrlikleriň we pudaklaýyn dolandyryş edaralarynyň, jemgyýetçilik guramalarynyň, köpçülikleýin habar beriş serişdeleriniň wekilleri, daşary ýurtlaryň Türkmenistanda işleýän diplomatik wekilhanalarynyň, halkara guramalaryň ýolbaşçylary, daşary ýurtly myhmanlar gatnaşdylar. Bu ýerde, ilki bilen, Türkmenistanyň Prezidenti Serdar Berdimuhamedowyň sergä gatnaşyjylara iberen Gutlagy uly üns bilen diňlenildi.

Sergä Türkmenistanyň degişli ministrlikleriniň we pudak edaralarynyň bilermenleridir hünärmenleri, Senagatçylar we telekeçiler birleşmesiniň agzalary, türkmen işewürleri, daşary ýurt kompaniýalarynyň wekilleri gatnaşýarlar.

Sergä halkara guramalaryň, şeýle-de 30-dan gowrak daşary ýurduň derman serişdelerini we lukmançylyk maksatly önümleri, lukmançylyk, sport enjamlaryny öndürmäge, bilim tehnologiýalaryny işläp taýýarlamaga ýöriteleşen kompaniýalarynyň 150-den gowragynyň wekilleri gatnaşýarlar.

Şu gün günüň ikinji ýarymynda Türkmenistanyň Söwda-senagat edarasynyň binasynda halkara serginiň çäklerinde ylmy maslahat hem geçiriler. Ol dünýäniň 20-ä golaý ýurdundan öňdebaryjy ýokary okuw mekdepleriniň alymlaryny, professorlaryny bir ýere jemlär.

Sergi 12-nji oktýabra çenli öz işini dowam eder.