«Merw» futbol toparynyň baş tälimçisi Witaliý Alikperow ertir AFK-nyň kubogynda Gyrgyzystanyň «Abdyş-Ata» topary bilen geçiriljek duşuşyk barada pikirlerini paýlaşdy. «Aşgabat» stadionynda geçiriljek duşuşyk sagat 17-de başlanar.

«Türkmenistanyň kubogynda «Ahal», çempionatda bolsa «Altyn asyr» bilen geçirilen kyn duşuşyklardan soň, ertir ýene bir möhüm duşuşyga çykarys. Täjigistandan gaýdyp gelen dessimize kyn duşuşyklary geçirmek oglanlary biraz ýadatdy. Ýöne ertirki duşuşyga çenli dynç almaga-da, ýeterlik derejede türgenleşmäge-de wagt tapdyk. Elbetde, käbir şikesli futbolçylarymyz bar. Olar baradaky çözgüdi lukmanymyzyň rugsady bilen kabul ederis. Ýöne ynam bildirip boljak zehinli ýaşlarymyz hem bar» diýip, ol şu gün paýtagtda geçirilen metbugat maslahatynda aýtdy.

― Duşuşykdan nähili netijä garaşýarsyňyz?

― Kynçylyk bilen bilen hem bolsa ýaryşyň toparçalaýyn tapgyryna goşulmagy başardyk. Ertir hem meýdanyň her metri üçin ýiti göreş alyp bararys. Üstünlikli oýnap, janköýerlerimizi begendirmäge çalşarys. Ýaryşa ilkinji gezek gatnaşýan hem bolsak, duýgularyna erk edip bilýän futbolçylarymyz bar. Ertir ähli zat biziň isleýşimiz ýaly bolar diýip tama edýäris.

Witaliý Alikperow 1-nji tapgyrda garşydaşyň «Altyn asyr» bilen geçiren duşuşygyna-da (3:0) tomaşa edendigini aýtdy:

― Birinji ýarym deňlikde tamamlandy. Ikinji ýarymda bolsa «Abdyş-Atanyň» oýunçylary üç gol geçirip bildiler. Biz bu ýagdaýdan özümize gerekli netijäni çykardyk. Häzir ol barada açyk aýtmarys, bu biziň taktiki syrymyz bolup galsyn. Ähli zat ertir meýdanda anyklaşar.

― «Absdyş-Atanyň» düzüminde maryly futbolçy Teýmur Çaryýew hem bar. Teýmur baradaky pikirleriňiz?

― Hawa, ol biziň mekdebimiziň uçurymy. Onuň başaryp biljeklerini, meýdanyň haýsy ýerinde has netijeli oýnaýandygyny bilýäris. Elbetde, ertir Teýmuryň başarnyklaryny hem göz öňünde tutarys, ýöne göz öňünde tutjaklarymyz diňe munuň bilen çäklenmez. Garşydaşyň başga-da güýçli oýunçylary kän. Olar barada ýene-de seljermeleri geçirip, duşuşyga has taýýarlykly çykarys. Näme boljakdygyny bolsa oýun görkezer.