Girmek
Malaýziýanyň Sarawak welaýatynda ýerleşýän Kuçing şäherinde iş ýylynyň jemlenmegine bagyşlanan ABU Ähliumumy habarlar forumy geçirildi.
10-njy iýulda bolan çärä 30-dan gowrak ýurduň köpçülikleýin habar beriş serişdeleriniň wekilleri, şol sanda Türkmenistanyň Telewideniýe, radiogepleşikler we kinematografiýa baradaky döwlet komitetiniň Halkara habarlar merkeziniň, Ýewropa teleradioýaýlymlar birleşiginiň, Afrika teleradioýaýlymlar birleşiginiň wekiliýetleri hem gatnaşdy.
Forumyň gün tertibine «Dostlukly birleşikleriň täzelikleri, seslenme we geljek 12 aýyň ileri tutulýan ugurlary», «Okuw we mümkinçilikleri ýokarlandyrmak», «Howa baradaky çözgütler», «Halkara tomaşaçylar toparyny döretmek» we «Habarlar gün tertibinde Durnukly ösüş maksatlaryny ileri tutulýan ugurlar derejesine getirmek» ýaly meseleler ara alnyp maslahatlaşyldy. Bu barada Halkara habarlar merkezi habar berýär.
Çäräniň çäklerinde dürli habar agentlikleriniň wekilleri bilen Aziýa-Ýuwaş umman teleradiogepleşikler birleşiginiň agzalarynyň arasynda ikitaraplaýyn duşuşyklar hem geçirildi.