Ozal habar berşimiz ýaly, 29-njy iýunda sebitde deňi-taýy bolmadyk Arkadag şäheriniň gurluşygynyň birinji tapgyrynyň ýokary derejede açylmagy meýilleşdirilýär. Açylyş dabarasyna köpsanly daşary ýurtly myhmanlaryň hem gatnaşmagyna garaşylýar.

«CentralAsia.news» habarlar gullugynyň şu gün auditoriýasyna ýetiren habarynda beýan edilmegine görä, Arkadag şäheriniň açylyşyna Ýewropadan we Aziýadan rekord derejede ýokary derejeli myhmanlar gatnaşarlar.

Bellenilişi ýaly, Arkadag şäheriniň açylyş dabaralary birnäçe gün dowam eder. Ýurduň taryhyndaky bu möhüm ähmiýetli waka 20-ä golaý ýurtdan we abraýly halkara guramalaryň 12-sinden köpsanly myhmanlar gatnaşar. Maglumata görä, Awstriýa, Azerbaýjan, Ermenistan, Germaniýa, Gruziýa, Gyrgyzystan, Hytaý, Katar, Koreýa, Özbegistan, Russiýa, Türkiýe we Ýaponiýa ýaly ýurtlardan 100-e golaý, BMG, GDA, ÝHHG, UN-Habibat, ÝUNESKO, Russiýanyň Arhitektorlar bileleşigi, Aýlagdaky Arap döwletleriniň hyzmatdaşlyk geňeşi, Sambo federasiýasy, Türki döwletleriň Inženerler we arhitektorlar bileleşigi, TÜRKSOÝ, Ýewraziýa patent guramasy, Ýewraziýa ykdysady hyzmatdaşlyk guramasy ýaly iri halkara guramalardan bolsa 30-a golaý ýokary derjeli wekiliýetiň açylyşa gatnaşmagyna garaşylýar. Şol sanda, Türkmenistanda akkreditlenen diplomatik wekilhanalaryň ýolbaşçylary, 20-ä golaý daşary ýurt kompaniýasynyň 40-dan gowrak işewüri, şeýle hem dünýäniň meşhur habar beriş serişdelerinden onlarça žurnalist çärelere gatnaşar.

Russiýa Federasiýasy we Hytaý Türkmenistanyň işjeň strategik hyzmatdaşy hasaplanýar. Şunuň bilen baglylykda, bu ýurtlardan geljek wekiliýetleriň has köp bolmagyna garaşylýar. Umuman alanyňda, diňe açylyş mynasybetli geçirilýän gala sergisine 180 töweregi myhman gatnaşar.

Şu ýylyň 16-nji iýunynda Türkmenistanyň Prezidenti Serdar Berdimuhamedowyň Arkadag şäheriniň gurluşygynyň ikinji tapgyryna badalga berendigini habar beripdik. Ikinji tapgyrda, esasan-da, senagat ugurly desgalar gurlar.