AFK-nyň gözükdirijisi, eýranly hünärmen Parnow Abdohosseýin Türkmenistanda «Level 1B» tälimçilik kursuny berdi. Bu barada Türkmenistanyň Futbol federasiýasy habar berýär.

Okuwlar Aziýanyň Futbol Konfederasiýasy hem-de Türkmenistanyň Futbol federasiýasy tarapyndan guraldy.

Paýtagtda geçirilen beden taýýarlygy boýunça okuw-kursunyň gözükdirijisine ýerli hünärmen ― AFK-nyň gözükdirijisi Röwşen Muhadow ýardam berdi. Okuw-kursy nazaryýetdir tejribeçilik sapaklaryny öz içine aldy.

Okuw-kursuna ýerli hünärmenleriň 11-siniň gatnaşandygyny bellemek gerek.

Ýeri gelende bellesek, okuw-kursy 2019-njy ýylda paýtagtymyzda geçirilen AFK-nyň «Level 1A» okuw-kursunyň dowamy bolup durýar.

Geçirilen okuw-kursunyň jemi boýunça synaglardan üstünlikli geçenlere ýörite sertifikatlar gowşurylar.