Girmek
Türkmenistanly Döwletjan Ýagşymyradow 10-njy martda «Bellator» promouşenindäki nobatdaky tutluşygyny geçirer. «Bellator 292» söweş agşamynyň çäginde geçiriljek tutluşykda Döwletjanyň garşydaşy litwaly Julius Englikas bolar.
«Bellator 292» söweş agşamy ABŞ-nyň Kaliforniýa ştatynyň San-Hose şäherinde ýerleşýän «SAP-center» arenasynda geçiriler. Bu turnir «Showtime» tölegli teleýaýlymynda ýaýlyma berler.
32 ýaşly Döwletjan Ýagşymyradow 2020-nji ýylyň dekabr aýynda «Bellator» promouşeni bilen şertnama baglaşdy. Ol bu promouşendäki soňky tutluşygyny 2022-nji ýylyň 16-njy aprelinde «Bellator 277» söweş agşamynyň çäginde braziliýaly Rafael Karwalýo garşy geçirip, ikinji raundda tehniki nokaut arkaly garşydaşyny ýeňlişe sezewar etdi. Şol üstünlik Döwletjan üçin «Bellatordaky» ilkinji ýeňiş boldy. Oňa çenli Döwletjan Ýagşymyradow «Bellatorda» iki tutluşyk geçirip, olaryň ikisinde hem garşydaşyndan asgyn gelipdi.
Umumylykda alanyňda, Ýagşymyradowyň hasabynda 19 ýeňiş, 7 ýeňliş we 1 deňlik bar. Ol 2018-nji ýylda «ACB-niň» çempiony bolup, 2019-njy ýylda promoşeniň ady «ACA» diýlip üýtgedileninden soňra hem çempionlyk guşagyny üstünlikli gorapdy
31 ýaşly litwaly Julius Englikas häzire çenli 13 tutluşyk geçirip, şolaryň 10-synda ýeňiş gazandy.