Aşgabadyň «Altyn asyr» futbol topary 25 ýaşly ýarym goragçy Yhlas Saparmämmedow bilen şu möwsümiň ahyryna çenli şertnama baglaşandygyny mälim etdi.

Saparmämmedow 2020-nji ýylyň tomsunda «Köpetdagyň» düzümine goşuldy. Ol 2018 ― 2020-nji ýyllaryň aralygynda bolsa «Ahal» futbol toparynyň köýnekçesini geýdi.

Yhlas Saparmämmedowyň Türkmenistanyň 21 ýaşa çenli ýaşlar ýygyndysynyň düzüminde 2015-nji ýylda Arkalaşygyň kubogyna hem gatnaşandygyny ýatladýarys.

Futbolçy 2019-njy ýyldan bäri Türkmenistanyň milli ýygyndysyna çagyrylyp gelýär. Ol milli ýygyndydaky ilkinji resmi duşuşygyny geçen ýyl myhmançylykda Koreýa Respublikasynyň ýygyndysyna garşy (0:5) geçirdi. Häzire çenli ol milli ýygyndyda 4 gezek meýdana çykdy.

Transfermarkt portaly Yhlas Saparmämmedowa 75 müň ýewro baha kesýär.