Girmek
Daşary ýurtly myhmanlar 28-nji noýabrda açyljak «Milli aýdym-saz sungaty dünýä halklarynyň mirasynda» atly halkara festiwalyna we maslahatyna gatnaşmak Aşgabat şäherine geldiler.
Döredijilik duşuşygy özboluşly ýerine ýetirijileri — halk aýdymçylaryny we sazandalaryny, şeýle hem Azerbaýjandan, Türkiýeden, Tatarstandan (Russiýa), Gazagystandan, Täjigistandan, Gyrgyzystandan, Özbegistandan, Eýrandan geljek milli saz gurallary ansambllaryny bir ýere jemlär. Festiwala Türkmenistanyň milli aýdym-saz sungatynyň hem köp sanly wekilleri gatnaşýarlar.
Ilkinji konsert 28-nji noýabrda, Döwlet medeniýet merkeziniň Mukamlar köşgüniň sahnasynda, forumyň dabaraly açylyşdan soň bolar.
Ertesi gün, sagat 15:00-dan 17:00-a çenli Aşgabatda ýerleşýän «Türkmenistan» we «Watan» kinokonsert merkezlerinde myhmanlaryň çykyşlary guralar. Çykyşlar 18:00-da Magtymguly adyndaky milli sazly drama teatrynyň sahnasynda dowam eder.
Şeýle hem halkara forumyň çäginde döredijilik duşuşyklary geçiriler, sazandalar Maýa Kulyýewa adyndaky Türkmen milli konserwatoriýasynyň ýanyndaky ýörite sazçylyk mekdep-internatynyň okuwçylary üçin milli gurallary çalmak boýunça ussatlyk sapaklaryny bererler.
30-njy noýabrda, «Milli aýdym-saz sungaty dünýä halklarynyň mirasynda» atly halkara festiwalyň we maslahatyň resmi ýapylyş dabarasyndan soň, Türkmenistanyň sungat ussatlary Mukamlar köşgüniň sahnasynda aýdym-sazly maksatnama boýunça çykyş ederler.