19-njy maýda Medeniýet ministrliginde Aşgabady “Dizaýn” ugry boýunça BMG-niň Bilim, ylym we medeniýet meseleleri boýunça guramasynyň (ÝUNESKO) döredijilik şäherleriniň toruna goşmak boýunça iş wideomaslahaty geçirildi. Oňa ýurdumyzyň ÝUNESKO-nyň ýanyndaky hemişelik wekili hem gatnaşdy.

Maslahatyň barşynda Aşgabady ÝUNESKO-nyň döredijilik şäherleriniň toruna goşmak bilen bagly meseleler hem-de ýetilen sepgitler we meýilleşdirilýän geljekki iş ara alnyp maslahatlaşyldy. Şeýle hem bu toruň medeniýete we durmuşy integrirlemäge maýa goýum goýmaga taýýar şäherleriň arasynda hyzmatdaşlyk babatda uzakmöhletleýin maksatnamany işläp düzmek meselesi barada pikir alşyldy.

Mälim bolşy ýaly, şu aýda Aşgabadyň degişli ýüztutmasy ÝUNESKO-nyň Sekretariaty tarapyndan resmi taýdan kabul edildi. Bu ýüztutma garaşsyz bilermenler tarapyndan seljeriler, soňky çözgüt ÝUNESKO-nyň Baş direktory tarapyndan 31-nji oktýabrda bellenilýän Bütindünýä şäherler güni baýramçylygynyň öňüsyrasynda yglan ediler.

Aşgabadyň ÝUNESKO-nyň döredijilik şäherleriniň toruna goşulmagy paýtagtymyzda halkara medeni hyzmatdaşlygyny ösdürmekde ýerine ýetiren işleriň ykrar edilmeginiň nobatdaky delili bolmak bilen çäklenmän, eýsem, medeniýeti we döredijiligi durnukly durmuş-ykdysady ösüşiň möhüm bölegi hökmünde kabul edilýän dünýäniň beýleki şäherleri bilen hyzmatdaşlygy giňeltmäge oňyn täsirini ýetirer.

Bu tor agza-şäherleriň intellektual gatnaşyklarynyň möhüm guralydyr, bilelikdäki halkara taslamalary durmuşa geçirmäge, medeniýet hem-de sungat ulgamynda gazanylan tejribeleri alyşmaga we Durnukly ösüş maksatlaryna ýetmek üçin döredijilik hem-de täzeçillik kuwwaty goldamaga bolan umumy gyzyklanmalary alamatlandyrýar. Maslahata gatnaşyjylar öňde goýlan maksada ýetmek üçin alnyp barylýan bilelikdäki işleriň ugurlaryny kesgitlemäge mümkinçilik berýän şeýle gatnaşyklary mundan beýläk-de dowam etdirmek barada bir pikire geldiler.