Girmek
Aşgabadyň «Köpetdag» futzal topary şu gün «Migrasiýa» bilen bolan duşuşykda 5:2 hasabynda üstün çykyp, Türkmenistanyň Naýbaşy kubogyna mynasyp boldy.
Olimpiýa şäherçesinde geçirilen duşuşykda Içeri işler ministrliginiň toparynyň pökgülerini Mülkaman Annagulyýew (3), Öwezbaý Muhammetmyradow we Arzuwguly Sapargulyýew geçirdi.
Ýeňiji topara arzyly kubogy Türkmenistanyň Futbol federasiýasynyň baş kätibi Arslan Aýnazarow gowşurdy.
«Köpetdag» Türkmenistanyň futzal ligasynyň geçen möwsüminiň çempionydyr. Döwlet Migrasiýa gullugynyň «Migrasiýa» topary bolsa geçen ýyl ýurdumyzyň kubogyna mynasyp boldy.
Türkmenistanyň çempionynyň we Kubogyna mynasyp bolan toparyň arasynda geçirilen Naýbaşy kubok ugrundaky duşuşyk bilen täze futzal möwsümine badalga berildi. Ýeri gelende, futzal boýunça Naýbaşy kubok ugrundaky ilkinji duşuşygyň geçen ýyl geçirilendigini ýatladýarys. «Köpetdag» bassyr ikinji gezek bu kuboga mynasyp boldy.