Türkmenistanyň futbol ýygyndysy şu gün Dünýä çempionaty ― 2022-niň saýlama tapgyrynyň çäginde Beýrutda geçirilen duşuşykda Liwanyň ýygyndysyndan 1:2 hasabynda asgyn geldi.

Duşuşygyň birinji ýarymy türkmen janköýerleriniň garaşmadyk ýakymsyz täzeligi bilen başlady. Heniz 5-nji minutda liwanly futbolçy Hilal el-Helwe biziň ýygyndymyzyň garşysyna hasaby açdy. 63-nji minutda kapitan Arslanmyrat Amanowyň özüne geçiren pökgüsinden soňra Altymyrat Annadurdyýew hasaby deňlän hem bolsa, bu deňlik uzaga çekmedi. Bu goldan bary-ýogy bir minut soňra ildeşlerimiz derwezesinde ikinji pökgini hem gördüler. Bu gezek Liwanyň ýygyndysyndan Nader Matar tapawutlandy. Duşuşyk ýer eýeleriniň 2:1 hasabyndaky üstünligi bilen hem tamamlandy.

Üç duşuşykdan soňra 3 utuk toplan milli ýygyndymyz häzir toparçada üçünji orny eýeleýär. Iki duşuşykda utugyny 6-a çykaran Koreýa Respublikasy toparçanyň başyna geçdi. Ikinji orny günortalylar bilen deň oýun oýnap, deň utuk toplan demirgazyklylar ― KHDR-sy eýeleýär. Iki duşuşykda 3 utuk gazanan Liwanyň ýygyndysy dördünji, heniz utuk gazanyp bilmedik Şri-Lankanyň ýygyndysy bolsa bäşinji orunda. Dünýä çempionatynyň nobatdaky saýlama tapgyryna her toparçanyň ýeňijisiniň we ikinji orny eýelän dört toparyň (eger Kataryň ýygyndysy E toparçada birinji orny eýelese 5) çykjakdygyny ýatladýarys.

Türkmen futbolçylary Beýrutda 13-nji oktýabra çenli bolarlar. Şondan soň olar El-Kuweýt şäherine sary ýola düşerler. 15-nji oktýabrda Kuweýt ― Türkmenistan ýoldaşlyk duşuşygynyň boljakdygyny ýatladýarys. Dünýä çempionatynyň saýlama duşuşyklarynyň 4-nji tapgyryna gatnaşmaýan milli ýygyndymyz, 5-nji tapgyrda ― 14-nji noýabarda Aşgabatda KHDR-nyň ýygyndysyny kabul eder.