Futbol boýunça Türkmenistanyň çempiony «Altyn Asyr» Aziýanyň futbol konfederasiýasyna girýän toparlaryň arasyndaky reýtinginde eýeleýän ornuny saklap galdy.

«globalfootballranks.com» portalynyň habaryna görä, Aşgabadyň topary geçen möwsümiň netijesine görä, AFK-nyň reýtinginde eýeleýän 99-njy ornuny saklap galdy. Türkmenistanyň çempiony umumylykda 9,519 ball toplamagy başardy.

Aziýanyň futbol konfederasiýasynda öňdäki bäş orny «Al Hilal» (Saud Arabystany), «Al-Aýn» (BAE), «Guançjou Ewergrand» (Hytaý), «Seul» (Günorta Koreýa) hem-de «Çenbuk Hýundaý Motors» (Günorta Koreýa) toparlary eýeleýärler.

AFK-nyň reýtingindäki beýleki türkmen toparlary hakynda aýdanymyzda, onda AFK kubogy-2018-iň deslapky tapgyryndan çykyşyna başlaýan «Ahal» 122-nji, geçen möwsüm futbol boýunça Türkmenistanyň çempionatyny dördünji hatarda tamamlan Balkanabadyň «Balkan» topary 147-nji orny eýeleýär.

Merkezi Aziýa wekilçilik edýän toparlaryň arasynda Daşkendiň «Lokomotiw» topary (24-nji orun) iň ýokarky orny eýeleýär. AFK kubogy 2018-däki toparçalaýyn bäsleşikde «Altyn Asyryň» bäsdeşleri «Istiklol» (Täjigistan) 69-njy, Gyrgyz Respublikasynyň «Alaý» topary bolsa 124-nji orny eýeleýär.

«Ahalyň» AFK kubogy-2018-iň deslapky tapgyryndaky bäsdeşi Bişkegiň «Dordoýy» 128-nji orunda ornaşypdyr.

Reýting AFK-nyň Çempionlar ligasynda hem-de AFK kubogynda çykyş edýän toparlaryň 161-siniň görkezijileri esasynda taýýarlanyldy.